Sadio Mane បច្ចុប្បន្នកំពុងឈរជើងជាកីឡាករលេងនៅតំណែងប្រយុទ្ធដ៏ជោគជ័យមួយរូបប្រចាំតំបន់អឺរ៉ុប ក្រោយជាចំណែកជួយឲ្យ Liverpool ទទួលបានផ្លែផ្កាយ៉ាងឆាប់រហ័សនារយៈពេលប៉ុន្មានឆ្នាំចុងក្រោយ។
នៅពីក្រោយជីវិតពិតរបស់កីឡាករសេណេហ្គាល់ ប្រិយមិត្តមួយចំនួនប្រាកដជាធ្លាប់បានដឹងខ្លះៗរួចមកហើយ អំពីដំណើរខិតខំតស៊ូរបស់ Mane មុនឆ្លងកាត់មកដល់វិថីជោគជ័យទល់សព្វថ្ងៃនេះ។
CTS Sports ធ្វើការច្បិចលើកមកបង្ហាញនូវការពិត ៥ យ៉ាងពាក់ព័ន្ធនឹងជីវិត និងរឿងរ៉ាវខ្លះក្នុងអាជីពរបស់ Sadio Mane៖
៥.ឪពុកម្តាយរបស់គេមិនធ្លាប់មានលុយបញ្ជូនកូនឲ្យទៅសាលារៀនឡើយ
កាលពីនៅក្មេងៗ គ្រួសាររបស់ Mane មិនមានថវិកាគ្រប់គ្រាន់ក្នុងការបញ្ជូនគេឲ្យទៅសិក្សារៀនសូត្រដូចក្មេងឯទៀតឡើយ។ សាមីខ្លួនធ្លាប់បញ្ជាក់ច្បាស់អំពីរឿងនេះថា៖ “ម្តាយឪពុកខ្ញុំមិនដែលមានថវិកានោះទេ ដោយជារៀងរាល់ព្រឹកនិងរៀងរាល់ល្ងាច ខ្ញុំបានត្រឹមទៅលេងបាល់ទាត់ជាមួយមិត្តភក្តិក្នុងភូមិតែប៉ុណ្ណោះ”។
៤.អ្នកភូមិ Mane ធ្លាប់ជួយគេសម្រេចក្តីស្រមៃ
ដោយមើលឃើញដុងកីឡាបាល់ទាត់ពីកំណើតរបស់ Mane ដល់ថ្នាក់សូម្បីតែអ្នកភូមិដែលមិនជាប់សាច់ឈាមផងនោះ ក៏ជាអ្នកចូលរួមចំណែកជួយសម្រេចក្តីស្រមៃកីឡាកររូបនេះផងដែរ។ ដំបូងឡើយអាណាព្យាបាលនិងលោកពូរបស់គេបានត្រឹមលក់ដំណាំដាំដុះ ឲ្យទៅអ្នកជិតខាងគ្រាន់បានលុយខ្លះ តែយូរៗទៅដល់ថ្នាក់អ្នកក្នុងភូមិនាំគ្នាអង្គាសថវិកាជួយឲ្យ Mane បានចូលលេងបាល់ទាត់ពេញលេញទៀតផង។
ជាមួយទឹកចិត្តដ៏ធំធេងនេះហើយ ដែលរុញឲ្យ Mane ចាំឥតភ្លេច ហើយមកទល់សព្វថ្ងៃបានព្យាយាមតបស្នងត្រលប់ទៅវិញ តាមរយៈការសាងសង់សាលារៀន មន្ទីរពេទ្យ និងឧបត្ថម្ភប្រាក់ដល់គ្រួសារក្រីក្រក្នុងភូមិរបស់គេទៀតផង។
៣.ជាអ្នកគ្រោងកំណត់ត្រារកបាន Hat-Trick លឿនបំផុត
អំឡុងពេលលេងឲ្យ Southampton កីឡាករសញ្ជាតិសេណេហ្គាល់ ធ្លាប់រកបាន ៣ គ្រាប់នៅប្រកួតទោលប្រើពេលត្រឹម ១៧៦ វិនាទីប៉ុណ្ណោះ អំឡុងពេលលេងតតាំងនឹង Aston Villa។ ជាស្ថិតិយកឈ្នះលើកំណត់ត្រាចាស់របស់វីរបុរស Robbie Fowler ដែលត្រូវចាយពេលដល់ ៤ នាទី និង ៣៣ វិនាទីឯណោះ។
២.ធ្លាប់ត្រូវបានអ្នកគាំទ្រវាយប្រហារធ្វើបាប
នៅប្រកួត Africa Cup កាលពីឆ្នាំ ២០១៧ គ្រាដែលខ្សែប្រយុទ្ធរូបនេះបានខកខានការស៊ុតបាល់ ១១ ម៉ែត្រនិងក្រុមត្រូវរងបរាជ័យ ក៏ធ្វើឲ្យអ្នកគាំទ្រមានការខឹងសម្បាជាខ្លាំង។ ពេលនោះអ្នកគាំទ្រមួយផ្នែក បានធ្វើការវាយប្រហារទៅលើផ្ទះសាច់ញាតិរបស់ Mane ដែលត្រូវជាពូនៅឯរដ្ឋធានី Dakar ដោយមានការខូចខាតនៅរថយន្តតម្លៃជាង ៣ មុឺនដុល្លារមួយទៀតផង។
១.ធ្លាប់ជាមនុស្សដែលរមែងយឺតយ៉ាវ
កាលនៅលេងឲ្យ Southampton កីឡាករវ័យ ២៨ ឆ្នាំក៏ធ្លាប់ជាបុគ្គលឧស្សាហ៍មានទម្លាប់យឺតយ៉ាវមួយរូបផងដែរ ដោយទម្លាប់នេះបានធ្វើឲ្យមានការមិនពេញចិត្តពីសំណាក់អ្នកចាត់ការលោក Ronald Koeman អំឡុងពេលហ្វឹកហាត់និងនៅថ្ងៃប្រកួត ប៉ុន្តែក្រោយមកពេលផ្ទេរមក Liverpool គឺគេបានផ្លាស់ប្ដូរទម្លាប់អាក្រក់នោះចេញហើយ៕
ប្រភព៖ Sokkaa