ប្រសិនយើងមិនរាប់ម៉ោងបន្ថែម ការប្រកួតពេញម៉ោងលើទីលានគឺមានថេរវេលា ៩០ នាទី ចុះកន្លងមក តើអ្នកធ្លាប់បានដឹងពីគ្រាប់បាល់បញ្ចូលទីណាមួយ ដែលប្រើប្រាស់ពេលវេលាខ្លីបំផុតទេ?
តាមពិតទៅបើនិយាយថាធ្លាប់មានគ្រាប់បាល់ ប្រើពេលត្រឹម ១០ វិនាទីក្រោយអាជ្ញាកណ្ដាលផ្លុំកញ្ចែបើកការប្រកួត នោះអ្នកអាចនឹងមិនជឿនោះទេ ប៉ុន្តែបែបណាមិញវានៅតែជាការពិត ដែលបានចារក្នុងកំណត់ត្រាប្រវត្តិសាស្រ្តរួចជាស្រេចហើយ។
តទៅនេះ CTS Sports បង្ហាញ ៤ លើកនៅប្រកួតនៃការតតាំងក្លឹបធំៗ មិនរាប់ក្រុមជម្រើសជាតិ ដែលមានគ្រាប់បាល់បញ្ចូលទីប្រើពេលខ្លីបំផុត៖
៤.Alan Shearer ប្រើពេលត្រឹម ១០,៤ វិនាទី
នៅជំនួបរវាង Newcastle United និង Man City កាលពីឆ្នាំ ២០០៣ អតីតខ្សែប្រយុទ្ធរូបនេះបានបន្សល់កំណត់ត្រាដ៏អស្ចារ្យមួយ ដោយប្រើពេលត្រឹម ១០,៤ វិនាទីក្នុងការបំប៉ោងសំណាញ់ទី។ សម្រាប់គ្រាប់បាល់នេះ គឺកើតឡើងក្រោយការភ្លាត់ស្នៀតរបស់អ្នកចាំទី ដែលមិនអាចផ្តាច់បាល់ទាន់ពេលវេលា ហើយត្រូវស្កាត់យកលឿនៗពីខ្សែប្រយុទ្ធរបស់ Newcastle។
៣.Ledley King ប្រើពេលត្រឹម ១០ វិនាទី
ត្រលប់ទៅខែធ្នូ ឆ្នាំ ២០០០ អតីតខ្សែការពាររបស់មាន់ខ្នាយមាសគឺ Ledley King បានបង្កើតភាពអស្ចារ្យមួយទល់ក្លឹប Bradford City តាមរយៈការរកបានគ្រាប់បាល់ដើមតង់ ត្រឹមពេល ១០ វិនាទី។ ក្រោយកែបាល់ហើយភ្លាម Ledley បានបម្លាស់ទីយ៉ាងរហ័ស និងស៊ុតបាល់ស្រួចបញ្ចូលទីប្រវែងចម្ងាយជាង ២២ ម៉ែត្រ។
២.Roy Makaay ប្រើពេលត្រឹម ១០ វិនាទី
អតីតខ្សែប្រយុទ្ធ Roy Makaay ប្រើពេលត្រឹម ១០ វិនាទី ដែលជាគ្រាប់បាល់រហ័សបំផុតនៅ Champions League នាជំនួបរវាង Bayern Munich និង Real Madrid។ ពេលនោះគឺជាកំហុសរបស់ Roberto Carlos ដែលទទួលយកបាល់មិនបានល្អ និងស្កាត់បានភ្លាមៗ ដោយ Hasan Salihamidzic មុនបញ្ជូនឲ្យ Makaay សម្រេចទីដោយជោគជ័យ។
១.Tim Cahill ប្រើពេលត្រឹម ៧ វិនាទី
កីឡាករសញ្ជាតិអូស្ត្រាលីរូបនេះ បានជាប់ឈ្មោះក្នុងកំណត់ត្រាកំពូលនាមជាគ្រាប់បាល់លឿនបំផុតមួយនៅប្រវត្តិសាស្ត្របាល់ទាត់ ក៏ដូចជាលីគ MLS ប្រើពេលត្រឹម ៧ វិនាទីប៉ុណ្ណោះ ក្រោយកែបាល់ចេញពីជើង និងទទួលបានការបោះបាល់វែងពីមិត្តរួមក្រុម ហើយស៊ុតបញ្ចូលទីបានយ៉ាងល្អ៕
ប្រភព៖ Sportshow