លោក Rivaldo អតីតកីឡាករ Barcelona បានលើកឡើងថាបច្ចុប្បន្ននេះ VAR មិនមែនជាបញ្ហាសម្រាប់ក្រុមអ្នកមានបុណ្យទេ អ្វីដែលជាបញ្ហានោះគឺសមត្ថភាពក្រុមនេះផ្ទាល់តែម្ដង។
Barcelona តាំងពីនៅលេខ១រហូតមកធ្លាក់នៅលេខ២វិញ ហើយចាញ់ពិន្ទុក្រុម Real Madrid ទៀត ក៏ព្រោះតែពួកគេលេងស្មើច្រើនប្រកួតពេក។ ហើយថ្មីៗនេះ ក៏មានកីឡាករនិងថ្នាក់ដឹកនាំក្រុមនេះ បានបន្ទោសទៅ VAR ថាបានកាន់ជើងក្រុម Real Madrid ទៅវិញ ទើបធ្វើឱ្យពួកគេធ្លាក់មកលេខ២។
តែបើតាមការមើលឃើញរបស់ Rivaldo វិញ អ្វីដែលគួរឱ្យបន្ទោសនោះគឺមិនមែន VAR កាន់ជើងក្រុម Real Madrid នោះទេ។ ក្រុម Barcelona ផ្ទាល់គឺជាបញ្ហាខ្លួនឯង ដែលមិនមានសមត្ថភាពគ្រប់គ្រាន់សម្រាប់ឈ្នះការប្រកួត។ កីឡាករប្រេស៊ីលបានបន្ដទៀតថា ប្រធានក្លឹប Barcelona ដែលបានចោទប្រកាន់ VAR ថាលំអៀងនោះ គឺកំពុងតែរកលេសដើម្បីបំបាំងមុខពី Media ហើយ ចំពោះការអសមត្ថភាពដឹកនាំក្លឹបរបស់ខ្លួននិងបញ្ហាដែលបានកើតឡើងកន្លងមកក្នុងក្លឹបនេះ៕ប្រភព Goal
