ខ្សែប្រយុទ្ធ Luka Jovic ត្រូវបានក្រុម Real Madrid ឱ្យស្ថិតនៅផ្ទះមិនឱ្យចេញទៅណាទេ បន្ទាប់ពីមិត្តរបស់គេម្នាក់រកឃើញថាមានផ្ទុកមេរោគ Covid-19 ។
Jovic មិនមានវត្តមានហ្វឹកហាត់ជាមួយក្រុម Real Madrid ២ថ្ងៃមកហើយ បន្ទាប់ពីមានដំណឹងថាមិត្តជិតស្និទ្ធរបស់គេមានផ្ទុកមេរោគ Covid-19 ។ ក្រុម Real Madrid បានដាក់កីឡាករចំណូលថ្មីរបស់ខ្លួននេះនៅដោយឡែកក្នុងផ្ទះ និងមិនឱ្យចាកចេញទៅណាឡើយ បើទោះជាលទ្ធផលតេស្ដលើកទី១ចេញមកថាគ្មានមេរោគក៏ដោយ។ កីឡាករជម្រើសជាតិសែបរូបនេះ នឹងត្រូវធ្វើតេស្ដជាលើកទី២ទៀតនៅពេលខាងមុខ។
កីឡាករវ័យ២២ឆ្នាំខាងលើនេះ លេងរដូវកាលដំបូងឱ្យក្រុម Real Madrid មិនបានល្អនោះទេ ដោយមានបញ្ហាច្រើនបានកើតឡើងលើរូបគេ។ ប្រភពនៅអេស្ប៉ាញ បានបញ្ជាក់ថាក្រុមលោក Zidane បានបញ្ចូលឈ្មោះរូបគេក្នុងបញ្ជីលក់ចេញហើយនៅរដូវក្ដៅខាងមុខ៕ប្រភព Marca