ជំនួបដ៏ជក់ចិត្តក្នុង <<កម្មវិធីប្រកួតបាល់ទាត់មិត្តភាពសប្បុរសធម៌>> របស់ក្រុម CFA និង PEKMI FC កាលពីថ្ងៃសៅរ៍កន្លងទៅ បានបញ្ចប់ដោយលទ្ធផល ៣-៦។
ក្រោយចប់ការប្រកួត CFA ក៏បានបង្ហាញការអរគុណដល់សមាជិកខាងក្រុមបាល់ទាត់ PEKMI FC ទាំងអស់ដែលបានសហការចូលរួម ញាំងឲ្យកម្មវិធីប្រព្រឹត្តិទៅបានដោយរលូន និងអរគុណដល់ក្រុមហ៊ុនឧបត្ថម្ភធំ 2MBet ក៏ដូចជាក្រុមការងារ VEHA Media ដែលបានជួយដល់ផ្នែកផ្សព្វផ្សាយយ៉ាងសកម្មផងដែរ។
អ្វីដែលមិនអាចកាត់ថ្លៃបាន គឺទឹកចិត្តបងប្អូនអ្នកចូលរួមទស្សនា ក៏ដូចជាសប្បុរសជននានាដែលបានបរិច្ចាគជាថវិកា គាំទ្រដល់សកម្មភាពជួយប្អូនស្រី សន សារ៉ាត់ ដែលត្រូវការថវិកាចាំបាច់ព្យាបាលជំងឺមហារីកខួរឆ្អឹង។
តាមការបង្ហើបប្រាប់ពីតំណាងក្រុមបាល់ទាត់ CFA លោក អៃ សំអូន បញ្ជាក់ថាថវិកាដែលទទួលបានសរុបគឺមាន ១ ៥៤៤,៥ ដុល្លារ និង ៤៣០ ៥០០ រៀល។
បញ្ជាក់ថានេះជាជោគជ័យធំលើកទី ២ ហើយសម្រាប់កម្មវិធីប្រកួតបាល់ទាត់សប្បុរសធម៌ដែលផ្តួចផ្តើមបង្កើតឡើងដោយក្រុមបាល់ទាត់ CFA ខណៈកន្លងទៅក៏រៃជាថវិកាបានជាង ២ ពាន់ដុល្លារផងដែរសម្រាប់ជួយដល់កុមារី ស៊ាន ស្រីនិច្ច ដែលខ្វះខាតថវិកាក្នុងការវះកាត់ជើង៕