និយាយតែក្នុងការប្រកួតផ្លូវការ តើអ្នកធ្លាប់ឃើញអ្នកចាំទីប៉ុន្មាននាក់ដែលរងពិន័យកាតក្រហមនិងត្រូវបានអាជ្ញាកណ្ដាលបណ្ដេញចេញ? ជួលពេលនោះតំណែងអ្នកចាំទី ក៏ត្រូវបានជំនួសដោយសមាជិកណាម្នាក់របស់ក្រុម ដែលត្រូវបានសម្រេចពីសំណាក់អ្នកចាត់ការ។
CTS Sports បង្ហាញពេលវេលា ៤ លើក ដែលខ្សែការពារ និងខ្សែប្រយុទ្ធធ្លាប់ត្រូវបានចាត់តាំងឲ្យចូលមកចាំទីជំនួស អ្នកចាំទីដែលរងពិន័យកាតពីអាជ្ញាកណ្តាល៖
៤.Kyle Walker
កាលពីចុងឆ្នាំ ២០១៩ កន្លងទៅ នៅជំនួបរវាង Man City ទល់នឹង Atalanta នៅវគ្គជម្រុះក្នុងពូល Champions League ខ្សែការពារ Kyle Walker ធ្លាប់ប្តូរចូលមកចាំទីជំនួស Claudio Bravo នៅចុងតង់អំឡុងនាទី ៨០ ជាង ដែលរងពិន័យកាតក្រហម។ Walker ក៏បានសង្រ្គោះបាល់ Free Kick ចម្ងាយជាង ២០ ម៉ែត្រ និងអាចរក្សា ១ ពិន្ទុឲ្យ City ទៀតផង។
៣.Dani Alves
កាលពីឆ្នាំ ២០១៨ នៅជ័យជម្នះ ៤-១ លើ Sochaux ពានរង្វាន់ French Cup អំឡុងនាទី ៩០ អ្នកចាំទី Kevin Trapp បានបណ្តេញចេញពីការប្រកួតក្រោយបង្កកំហុសក្នុងប្រអប់គ្រោះថ្នាក់។ Alves បានប្តូរចូលមកជំនួសភ្លាមៗ និងឈរជើងបានជិត ១ នាទីមុនបញ្ចប់ការប្រកួត ហើយគ្មានការស៊ុតបាល់ចំគោលដៅអ្វីនោះទេពីក្រុមគូប្រជែង។
២.Kevin Großkreutz
ខ្សែការពាររបស់ក្លឹប Borussia Dortmund រូបនេះក៏ធ្លាប់ចូលចាំទីជំនួសមិត្តរួមក្រុម Romain Weidenfelelr គ្រាត្រូវបានបណ្តេញចេញផងដែរ ដោយគេបានឈរជើងប្រមាណ ១០ នាទី កាលប៉ះ Hoffenheim នៅឆ្នាំ ២០១៣។
១.Harry Kane
ជាខ្សែប្រយុទ្ធមួយរូបដែលធ្លាប់ប្តូរមកពាក់ស្រោមដៃក្លាយជាអ្នកចាំទី កាលពីឆ្នាំ ២០១៤ កន្លងទៅ ពេល Tottenham ត្រូវតតាំងក្លឹប Asteras Tripolis របស់ប្រទេសក្រិក។ ប្រកួតនោះ Kane រកបាន Hat-Trick ហើយនៅចុងម៉ោងពេលអ្នកចាំទី Hugo Lloris បង្កកំហុស និង Spurs ប្រើប្រាស់សិទ្ធប្តូរកីឡាករគ្រប់គ្នាហើយនោះ ក៏ Kane ត្រូវបង្ខំចិត្តប្តូរមកចាំទីជំនួស ប៉ុន្តែគេសង្រ្គោះបាល់មិនបានល្អឡើយ៕