កីឡាករវាយកូនគោល Tiger Woods បានបញ្ជាក់ថាខ្លួនមិនទាន់អាចលេងល្អ១០០%នៅឡើយទេ ក្នុងពានរង្វាន់ Open Championship នៅ Carnoustie នាប្រទេសស្កុតឡែននេះ។
Wood វ័យ៤២ឆ្នាំមិនបានឈ្នះពានរង្វាន់អ្វីមួយទាល់តែសោះ ចាប់តាំងពីឆ្នាំ២០០៨មក ដោយសារតែមានបញ្ហារបួសចង្កេះ និងរឿងរ៉ាវផ្ទាល់ខ្លួនជាច្រើនទៀត។ សម្រាប់ការចូលរួមប្រកួតនាឆ្នាំនេះវិញ រូបគេទទួលបានចំណាត់ថ្នាក់លេខ៦ដែរ ប៉ុន្តែសាមីខ្លួនបញ្ជាក់ថានេះជាការចាប់ផ្ដើមរបស់ខ្លួនត្រលប់ចូលទីលានវិញប៉ុណ្ណោះ។
បុរសសញ្ជាតិអាមេរិកខាងលើបាននិយាយថា៖ “ខ្ញុំមានឱកាសល្អៗជាច្រើន។ ខ្ញុំមានអារម្មណ៍ល្អឡើងវិញ បើទោះជាមិនបានឈ្នះក៏ដោយ។ ខ្ញុំសង្ឃឹមថាខ្ញុំអាចនឹងឈានដល់ចំណុចកំពូលឡើងវិញនាពេលឆាប់ៗខាងមុខនេះ ខ្ញុំនឹងប្រឹងប្រែងបន្ថែមទៀត”។
ពានរង្វាន់ Open Championship ខាងលើនេះ ចំណាត់ថ្នាក់លេខ១បានទៅលើកីឡាករ Francesco Molinari សញ្ជាតិអ៊ីតាលី ហើយរូបគេក៏បានជាប់ឈ្មោះជាកីឡាករអ៊ីតាលីដំបូងគេដែលអាចយកពានរង្វាន់វាយកូនគោលក្នុងព្រឹត្តិការណ៍ធំៗផងដែរ៕
