ក្រុម Atletico Madrid លេងស្មើក្រុម FC Barcelona ក្នុងលទ្ធផល ២-២ កាលពីយប់មិញនេះ ធ្វើឱ្យឱកាសប្រជែងពានរង្វាន់ក្រុម Barca កាន់តែតិចទៅហើយ។
សម្រាប់ការប្រកួតនៅយប់មិញនេះដែរ គេសង្កេតឃើញថាមិនមានវត្តមានរបស់ខ្សែប្រយុទ្ធ Antoine Griezmann ចូលជួយក្រុមអ្នកមានបុណ្យនោះទេ។ ដោយត្រូវរង់ចាំដល់នាទី៩០ទៅហើយ ទើបកីឡាករបារាំងនេះ អាចចូលលេងបាន ប៉ុន្តែនៅចុងម៉ោងពេកផងនោះ ការប្រកួតមិនមានអ្វីប្រែប្រួលទេ ពោលគឺរក្សាលទ្ធផល ២-២ ដដែល។
Antoine Griezmann ក្រោមការដឹកនាំរបស់លោក Setien គឺមិនមានឱកាសពេញលេញដើម្បីបង្ហាញសមត្ថភាពឡើយ តាំងពីបើករដូវកាលមកម្ល៉េះ។ រឿងនេះ ត្រូវបានអ្នកកាសែតលើកទៅសួរលោក Simeone ដែលធ្លាប់ជាអតីតគ្រូបង្វឹករបស់ Griezmann ។ លោក Simeone ឆ្លើយទៅប្រាប់អ្នកកាសែតវិញ ដោយខ្លីបំផុត គឺលោកមិនមានពាក្យអ្វីនិយាយពីក្រុមដទៃឡើយ។ អ្នកចាត់ការក្រុម AT Madrid រូបនេះ ផ្ដោតតែលើក្រុមខ្លួនឯងប៉ុណ្ណោះ ខណៈដែលក្រុមឬរឿងផ្ទៃក្នុងក្រុមដទៃ លោកមិនចង់ដឹង ហើយក៏មិនចង់វែកញែកដែរ៕ប្រភព Marca
