គណៈកម្មាធិការជាតិប៉ារ៉ាឡាំពិកម្ពុជាបានរៀបចំពិធីជួបជុំកីឡាករកីឡាការិនីរបស់ខ្លួនជាង១០០នាក់ ដែលហ្វឹកហាត់កីឡាប្រមាណ១០ប្រភេទមកជួបជុំគ្នានៅមជ្ឈមណ្ឌលជាតិនៃ ជនពិការតេជោសែន នាព្រឹកថ្ងៃទី២៩ ខែមិថុនា ឆ្នាំ២០២០ ដើម្បីផ្ដល់នូវព័ត៌មានសំខាន់ៗ និងជាពិសេស ពីពេលវេលានៃការចូលមកហ្វឹកហាត់ឡើងវិញក្នុងជំរំប្រមូលផ្ដុំ ក្រោយពីពួកគេត្រូវបានរំសាយអស់ពេលជាច្រើនខែដោយសារវិបត្តិនៃជំងឺកូវីដ១៩។
ឯកឧត្តម យី វាសនា អគ្គលេខាធិការ គណៈកម្មាធិការជាតិប៉ារ៉ាឡាំពិកកម្ពុជាមានប្រសាសន៍ថា ដោយសារមានការអនុញ្ញាតពីរាជរដ្ឋាភិបាល និងក្រសួងអប់រំ យុវជន និងកីឡា គ្រប់ប្រភេទកីឡាទាំងអស់ ដែលមានប្រមាណ១០ប្រភេទ មានអត្តពលិក ចំនួន១២៥នាក់ និង គ្រូបង្វឹក១០នាក់ នឹងត្រូវវិលចូលក្នុងជំរំហ្វឹកហាត់វិញ ដោយចាប់ផ្ដើមពីថ្ងៃទី១ ខែកក្កដា ឆ្នាំ២០២០ រហូតដល់ដំណាច់ឆ្នាំ។
ក្នុងចំនួននេះ ខាងក្រសួងអប់រំ យុវជន និងកីឡាបានផ្ដល់ប្រាក់ឧបត្ថម្ភថវិកាប្រចាំខែ ក្នុងពេលហ្វឹកហាត់ សម្រាប់កីឡាករ៤០នាក់និង គ្រូបង្វឹក១០នាក់ ប៉ុណ្ណោះ ប៉ុន្ដែដើម្បីឱ្យអត្តពលិកចូលរួមហាត់បានច្រើន គណៈកម្មាធិការប៉ារ៉ាឡាំពិកម្ពុជាបានសម្រេចដោយឯកភាពឱ្យអត្តពលិកធ្វើការហ្វឹកហាត់ទាំងអស់គ្នា និងបែងចែកថវិកាទាំងនោះឱ្យបានគ្រប់គ្នា។ ឯកឧត្តមបានណែនាំដល់កីឡាករកីឡាការិនីទាំងអស់ត្រូវយកចិត្តទុកដាក់ក្នុងការថែទាំសុខភាព និងត្រូវអនុវត្តន៍វិធានការការពារជំងឺកូវីដ-១៩ឱ្យបានខ្ជាប់ខ្ជួន មិនអាចធ្វេសប្រហែសបានឡើយ។
ជាមួយគ្នានេះ ឯកឧត្តម ក៏បានជូនដំណឹងផងដែរ ពីការលុបចោលអាស៊ាន ប៉ារ៉ាហ្គេមលើកទី១០ នៅហ្វីលីពីន តាមរយៈ កិច្ចប្រជុំអនឡាញ កាលពីពេលថ្មីៗនេះ របស់ ក្រុមប្រឹក្សាភិបាលនៃសហព័ន្ធកីឡាជនពិការអាស៊ាន។