កីឡាករបាល់ទាត់ល្បីឈ្មោះមួយចំនួនធំ ក្រៅពីមានទេពកោសល្យលើទីលានប្រកួត ខ្លះក៏មានទាំងរូបរាងសង្ហារ និងលក្ខណៈសម្បត្តិដ៏ល្អផងដែរ។
ហេតុផលនេះហើយដែលបានទាក់ចិត្តនារីៗជាច្រើន ឲ្យមានចិត្តបេតីទៅលើពួកគេ រហូតដល់ស្រីៗខ្លះក្រៅពីគាំទ្រ ក៏មានទាំងកូនចិត្តលួចគិតចង់បានកីឡាកររូបនោះជាគូស្នេហ៍ទៅថ្ងៃមុខទៀតផង។
អត្ថបទនេះ CTS Sports បង្ហាញគូស្នេហ៍នៃកីឡាករ ៤ រូប ដែលផ្តើមចេញពីក្តីស្រលាញ់រវាង Fans និង iDol ក្នុងវិស័យបាល់ទាត់៖
៤) David de Gea និង Edurne
Edurne Garcia Almagro គឺជាអ្នកចម្រៀង តារាសម្តែង និងអ្នកអធិប្បាយលើប៉ុស្តិ៍ទូរទស្សន៍នៅឯប្រទេសអេស្ប៉ាញ។ នាងមានស្រុកកំណើតនៅទីក្រុង Madrid ហើយបានស្រលាញ់គាំទ្រ David de Gea ជាខ្លាំង ដោយមើលឃើញថា កីឡាកររូបនេះគឺជាអ្នកចាំទីល្អបំផុតក្នុងពិភពលោក។
គាំទ្រចុះគាំទ្រឡើង ភ្លើងស្នេហ៍រវាងអ្នកទាំងពីរក៏បានបញ្ឆេះចេញរូបរាងនៅឆ្នាំ ២០១០ ហើយពួកគេបន្តស្រលាញ់គ្នាមកទល់បច្ចុប្បន្ន និងមានចែកចាយនូវរូបភាពផ្អែមល្ហែមរាប់ភ្លេចនៅលើបណ្ដាញសង្គមទៀតផង។
៣) Sergio Ramos និង Pilar Rubio
Pilair Rubio Fernandez ក៏ជាអ្នករាយការណ៍និងអ្នកអធិប្បាយលើប៉ុស្តិ៍ទូរទស្សន៍មួយរបស់ប្រទេសអេស្ប៉ាញដូចគ្នា ដោយនាងបានលួចស្រលាញ់ Sergio Ramos ដែលជា iDol របស់ខ្លួនអស់រយៈពេលយូរណាស់មកហើយ ទម្រាំតែបានចាប់ដៃគ្នាក្លាយជាគូស្នេហ៍ផ្លូវការនៅខែកញ្ញា ឆ្នាំ ២០១២។ មកទល់ពេលនេះអ្នកទាំងពីរមានកូន ៣ រូប រួមមាន Sergio, Marco និង Alejandro។
២) Lionel Messi និង Antonella Rocuzzo
Messi មានទំនាក់ទំនងស្នេហាជាមួយ Rocuzzo តាំងពីឆ្នាំ ២០០៨ គ្រាដែល M10 ទើបតែមានអាយុ ២០ ឆ្នាំ។ បើនិយាយពីសាច់ស្គាល់គ្នា គឺស្គាល់តាំងពីលោកនៅអាយុ ៥ ឆ្នាំមកម្ល៉េះ ព្រោះពេលនោះ Rocuzzo ជាបងប្អូនជីដូនមួយ ជាមួយនឹងមិត្តភក្តិជិតស្និទ្ធរបស់ Messi ហើយ Rocuzzo នាងហាក់ចូលចិត្តមើល Messi លេងបាល់ជាខ្លាំង។
ជានិច្ចកាលនាងតែងតែទៅមើលបងប្រុស ក៏ដូចជា Messi ផ្ទាល់លេងបាល់ ហើយតែងតែរំលេចវត្តមានគាំទ្រពួកគេជានិច្ច។ ទំនាក់ទំនងដ៏ជិតដិតមួយនេះ បានរុញឲ្យអ្នកទាំងពីរលួចមានចិត្តលើគ្នា ហើយស្ថិតក្នុងស្នេហាបែបលាក់បាំងអស់រយៈពេលជាង ១ ឆ្នាំ រហូតដល់ខែមករា ឆ្នាំ ២០០៩ នៅបទសម្ភាសន៍មួយ Messi បានទម្លាយជាផ្លូវការអំពីរឿងនោះ ហើយមកទល់បច្ចុប្បន្នពួកគេមានកូន ៣ រូបរួមមាន Thiago, Mateo និង Ciro។
១) Cesc Fabregas និង Daniella Semann
Daniella ជាស្រ្តីមេម៉ាយ ដែលមានកូនប្រុសឈ្មោះ Joseph ហើយចាប់ផ្តើមមានទំនាក់ទំនងជាមួយ Fabregas ក្រោយពេលដែលនាងទៅសុំហត្ថលេខារបស់កីឡាករអេស្ប៉ាញនៅឯអាហារដ្ឋានមួយក្នុងចក្រភពអង់គ្លេស។
លុះដល់ឆ្នាំ ២០១១ អ្នកទាំងពីរក៏ចាប់ផ្តើមស្រលាញ់គ្នា ហើយបានរៀបអាពាហ៍ពិពាហ៍កាលពីឆ្នាំ ២០១៨ កន្លងទៅ។ បញ្ជាក់ថា Fabregas ទើបតែអាយុ ៣៣ ឆ្នាំ ដែលជាអាយុប្អូន Daniella ដល់ទៅ ១១ ឆ្នាំឯណោះ៕