អ្នកចាត់ការលោក Jurgen Klopp បានដឹកនាំឲ្យក្លឹបហង្សក្រហម Liverpool ស្គាល់រសជាតិឈ្នះពាន Premier League ជាលើកដំបូង ក្រោយខកខានឈ្នះពានលីគអស់រយៈពេល ៣០ ឆ្នាំ។
Klopp បានក្លាយជាប្រធានបទដ៏ក្តៅគគុកនៅរយៈពេលចុងក្រោយនេះ នាមជាបុគ្គលដែលទទួលបានការស្ងើចសរសើរខ្លាំងបំផុតពីអ្នកគាំទ្ររាប់លាននាក់នៅទូទាំងសកលលោក និងជាបុគ្គលដ៏សំខាន់ដែលជួយឲ្យក្លឹបម្ចាស់ដី Anfield មានទម្រង់លេងឡើងកូដខ្លាំងនៅប៉ុន្មានឆ្នាំចុងក្រោយ។
តើនៅពីក្រោយភាពជោគជ័យទាំងនេះ បុរសវ័យ ៥៣ ឆ្នាំ មានដំណើរជីវិត និងប្រវត្តិជោគជ័យកាលនៅជាកីឡាករបែបណាខ្លះ? តោះទៅតាមដានជាមួយ CTS Sports ដូចតទៅ៖
លោកមានឈ្មោះពេញ Jurgen Norbert Klopp កើតនៅថ្ងៃទី ២៦ មករា ឆ្នាំ ១៩៦៣ ក្នុងទីក្រុង Stuttgart ប្រទេសអាល្លឺម៉ង់ ដោយមានឪពុកឈ្មោះ Norbert Klopp ដែលជាអតីតកីឡាករបាល់ទាត់មួយរូប និងម្តាយឈ្មោះ Elisabeth Klopp ដែលជាអតីតបុគ្គលិកបម្រើការផ្នែកលក់។
តាំងពីនៅវ័យកុមារ Klopp មានក្តីស្រមៃចង់ក្លាយជាកីឡាករបាល់ទាត់ និងជាអ្នកចាត់ការដ៏ជោគជ័យមួយរូប។ ការចាប់ផ្តើមរបស់លោក គឺកើតឡើងនៅពេលលោកចូលរួមលេងជាមួយថ្នាលយុវជន Ergenzingen ក្នុងប្រទេសអាល្លឺម៉ង់ នៅវ័យ ១៦ ឆ្នាំ លោកត្រូវបានគេស្គាល់ថាជាមនុស្សព្យាយាម និងមិនងាយបោះបង់អ្វីមួយនោះទេ ប៉ុន្តែក៏ជាប្រភេទមនុស្សដែលចូលចិត្តលេងសើចជាមួយអ្នករាល់គ្នាផងដែរ។
រហូតដល់អាយុ ២៣ ឆ្នាំ ទើប Klopp មានឱកាសវិវត្តខ្លួនមកចូលរួមនៅឈុតធំជាមួយក្លឹប Ergenzingen ដោយលោកអាចថាជាមនុស្សដែលស្រលាញ់ស្រុកកំណើតខ្លាំងបំផុត ព្រោះមួយអាជីពជាកីឡាករបាល់ទាត់ Klopp មិនបានផ្ទេរទៅកាន់ក្លឹបក្រៅប្រទេសអាល្លឺម៉ង់នោះទេ ពោលគឺបន្តលេងឲ្យក្លឹបក្នុងស្រុកមួយចំនួនដូចជា Pforzheim, Sindlingen, Frankfurt និង Mainz 05។
លោកបានចំណាយពេលសឹងមួយអាជីព គឺរយៈពេលជាង ១០ ឆ្នាំជាមួយ Mainz 05 ដែលដំបូងឡើយលោកជាតំណែងខ្សែប្រយុទ្ធ ប៉ុន្តែក្រោយមកប្តូរទៅលេងនៅតំណែងការពារស្លាបស្តាំវិញ។ សរុបគ្រាប់បាល់ក្នុងលីគ Klopp ធ្វើបាន ៥៦ គ្រាប់ឲ្យក្លឹប។ និយាយពីពានរង្វាន់គឺ Klopp ទទួលបានតែ ១ លើកគត់នាមជាកីឡាករបាល់ទាត់ នៅរដូវកាល ១៩៨៦/៨៧ ពេលលេងឲ្យក្លឹប Pforzheim បែបនេះអាចនិយាយថា កាលនៅអាជីពជាកីឡាករលោក Klopp មិនមែនជាបុគ្គលដែលទទួលបានជោគជ័យអ្វីនោះទេ។
រហូតដល់ឆ្នាំ ២០០១ លោក Klopp បានប្រកាសចូលនិវត្តន៍ពីកីឡាករបាល់ទាត់ ពោលគឺនៅពេលដែលលោកមានអាយុ ៣៨ ឆ្នាំ តែលោកបានទទួលឱកាសក្លាយជាអ្នកចាត់ការភ្លាមៗ ដោយចូលដឹកនាំជំនួសលោក Eckhard Krautzun នៅក្លឹប Mainz 05 នោះផ្ទាល់តែម្តង។ អំឡុងពេលដឹកនាំក្លឹបនេះរយៈពេល ៧ ឆ្នាំ លោកត្រឹមបានជួយឲ្យក្លឹបអាចវិវត្តខ្លួនទៅចូលរួមនៅ Bundesliga លីគលំដាប់ទី ១ របស់អាល្លឺម៉ង់ និងជាប់ឈ្មោះបានលេងនៅវគ្គជម្រុះ UEFA Cup រដូវកាល ២០០៥/០៦ តែប៉ុណ្ណោះ។
រហូតដល់ឆ្នាំ ២០០៨ លោក Klopp បានទៅដឹកនាំក្លឹប Borussia Dortmund ដែលទីនោះហើយជាកន្លែងដែលធ្វើឲ្យលោកមានកេរឈ្មោះបោះសំឡេងខ្លាំងនិងចាប់ផ្តើមមានអ្នកគាំទ្រជាច្រើនទទួលស្គាល់ពីភាពជោគជ័យរបស់លោក។ ជាមួយ Dortmund អ្នកចាត់ការសញ្ជាតិអាល្លឺម៉ង់ធ្លាប់ជួយឲ្យឈ្នះពាន Bundesliga ២ លើក German Cup ១ លើក និង German Super Cup ២ លើក ហើយក៏ធ្លាប់មានឱកាសដឹកនាំក្រុមឡើងដល់វគ្គផ្តាច់ព្រ័ត្រពាន UEFA Champions League ដែរ តែមិនទទួលបានជ័យជម្នះ។ស
Klopp បានរំកិលខ្លួនចេញមកដឹកនាំក្លឹបក្រៅតំបន់ នៅខែតុលា ឆ្នាំ ២០១៥ នោះគឺជាពេលដែលលោកក្លាយជាអ្នកចាត់ការរបស់ហង្សក្រហម Liverpool។ លោកជាអ្នកចាត់ការសញ្ជាតិអាល្លឺម៉ង់ទី ២ ក្នុងប្រវត្តិសាស្ត្រ ដែលមកដឹកនាំក្លឹបនៅអង់គ្លេស បន្ទាប់ពីគ្រូចាស់លោក Felix Magath ដែលធ្លាប់ដឹកនាំ Fulham ក្នុងឆ្នាំ ២០១៤។
នៅកិច្ចសម្ភាសន៍ដំបូងបង្អស់នាមជាគ្រូបង្វឹកលោក Klopp ធ្លាប់មានប្រសាសន៍ថា៖ “សូមផ្តល់ពេលវេលាសម្រាប់ពួកយើង ដោយខ្ញុំហ៊ានថារយៈពេល ៤ ឆ្នាំទៅមុខ យ៉ាងហោចណាស់យើងនឹងបានឈ្នះពានរង្វាន់មួយ”។
ក្រឡេកមកមើលឆ្នាំ ២០២០ នេះ ពោលគឺ ៥ ឆ្នាំបន្ទាប់ក្រោយ Klopp ចូលដឹកនាំ Liverpool សរុបពានធំៗ ៤ ដែលក្លឹបទទួលបានគឺមានដូចជា UEFA Champions League, FIFA Club World Cup, UEFA Super Cup និង English Premier League ដែលទើបប្រកាសក្លាយជាជើងឯកកាលពីពេលថ្មីៗ។
ផ្សាភ្ជាប់ទៅនឹងចំណូលក៏ដូចជាទ្រព្យសម្បត្តិរបស់ Klopp បន្តិច ដោយអ្នកចាត់ការវ័យ ៥៣ ឆ្នាំត្រូវបានគេដឹងថាទទួលបានប្រាក់ឈ្នួលពីក្លឹប Liverpool ប្រមាណ ១២ លានដុល្លារ/ឆ្នាំ ឬគិតជាសប្ដាហ៍បានប្រមាណ ២៣៧ ០០០ ដុល្លារ។
ស្របពេលដែលទំហំទ្រព្យសម្បត្តិរួមរបស់លោក គឺមានប្រមាណ ៥០ លានដុល្លារ។ នេះបើតាមរបាយការណ៍ពី Celebrithy Net Worth បានចុះផ្សាយ៕