ក្រោយរងបរាជ័យទល់នឹងក្លឹប Chelsea ២-១ អ្នកចាត់ការរបស់ក្លឹប Man City លោក Pep Guardiola បានបង្ហាញពីអារម្មណ៍សោកស្តាយ បន្ទាប់ពីមើលឃើញនូវជ័យជម្នះនៃការឈ្នះពានរបស់ក្រុមគូប្រជែង Liverpool ដែលខកខានអស់រយៈពេល ៣០ ឆ្នាំហើយនោះ។
លោក Pep បានពន្យល់នូវមូលហេតុធំមួយ ដោយអះអាងថាក្រុមរបស់លោក មិនមានអារម្មណ៍ត្រេកត្រអាលចង់ឈ្នះពានខ្លាំងដូចហង្សនារដូវកាលនេះទេ ទើបជាមូលហេតុធ្វើឲ្យមានការថ្លោះធ្លោយជាច្រើនប្រកួតតាំងពីដើមរដូវកាល។
អ្នកចាត់ការសញ្ជាតិអេស្ប៉ាញនិយាយ៖ “ប្រហែលយើងមិនមានភាពត្រេកត្រអាលចង់ឈ្នះដូចជា Liverpool ដោយពួកគេរៀងរាល់ការប្រកួតចាត់ទុកដូចជាប្រកួតវគ្គចុងក្រោយរបស់គេអ៊ីចឹង បែបនេះអាចថាប្រហែលយើងមិនបានឈានដល់ចំណុចហ្នឹង ជាពិសេសគឺផ្នែកមួយនៃដើមរដូវកាលដំបូង ដោយវាជាការពិត ទើបយើងនៅក្រោយគេដាច់ឆ្ងាយ”។
លោកបន្ថែម៖ “Liverpool គឺពិតជាអស្ចារ្យពេញមួយរដូវកាលនេះ ខណៈដែលចាប់ផ្តើមរដូវកាលដំបូងយើងមានការរបូតពិន្ទុខ្លះ តែសម្រាប់ Liverpool បែរជាមិនរបូតទៅវិញ យ៉ាងណាមិញយើងនឹងព្យាយាមប៉ះប៉ូវរដូវកាលក្រោយ ឲ្យមានការផ្តោតជាងនេះ ហើយយើងចាំបាច់ត្រូវរៀនសូត្រពីវា ដើម្បីបញ្ចៀសមិនឲ្យជួបស្ថានភាពបែបនេះសារជាថ្មី”៕
ប្រភព៖ AF