ប្រសិន Neymar ជាចំណែកអាចជួយឲ្យ PSG ឈ្នះពានអឺរ៉ុប UEFA Champions League នោះគេនឹងឈ្នះពាន Ballon d’Or ហើយ។ នេះបើតាមការលើកឡើងរបស់អតីតកីឡាករជើងចាស់ Kaka។
Kaka ដែលជាកីឡាករធ្លាប់ឈ្នះពាន Ballon d’Or ចុងក្រោយគេបង្អស់នៅឆ្នាំ ២០០៧ មុនដល់ឈ្មោះរបស់ Cristiano Ronaldo ឬ Lionel Messi លើកបណ្ដាក់គ្នាជាបន្តបន្ទាប់ បានប្រាប់ Globo Esporte ពីបេក្ខភាពដែលមានភាគរយខ្ពស់អាចឈ្នះពានបុគ្គលមួយនេះថា៖ “ដំបូងបង្អស់នោះគឺ Neymar ដោយខ្ញុំជឿថា Neymar គេជាកីឡាករល្អបំផុតមួយនៅពេលបច្ចុប្បន្ន ប៉ុន្តែការដែលគេអាចឈ្នះពាននេះបានក៏ស៊ីសងទៅលើជោគជ័យដែលគេសម្រេចបានជាមួយក្រុម”។
លោកសង្កត់ធ្ងន់៖ “ឥឡូវយើងនឹងមើលការលេងវគ្គផ្តាច់ព្រ័ត្រនៅ Lisbon ប្រសិនណា PSG ជាម្ចាស់ជើងឯក នោះ Neymar សក្តិសមណាស់នឹងឈ្នះពានរង្វាន់នោះនាមជាកីឡាករល្អបំផុតក្នុងលោក”។
បញ្ជាក់ដែរថា PSG បានយកឈ្នះ Dortmund នៅវគ្គ ១៦ ក្រុមចុងក្រោយ ហើយបច្ចុប្បន្នកំពុងកក់កៅអីនៅវគ្គ ៨ ក្រុម រង់ចាំក្រុមដែលត្រូវតតាំងគ្នាសម្រាប់ព្រឹត្តិការណ៍នាពាក់កណ្តាលខែសីហាខាងមុខ៕
ប្រភព៖ AF