James Rodriguez ត្បិតធ្លាប់ជាកីឡាករមួយរូបដែល Real Madrid ចាយលុយក្រាស់ក្រែលកាលពីអតីតកាលពិតមែន តែមកទល់បច្ចុប្បន្នរូបគេហាក់មិនសូវជាសំខាន់សម្រាប់ក្លឹបទាល់តែសោះ។ ដូចជារដូវកាល ១៩/២០ កីឡាករកូឡុំប៊ី ទើបបានឈរជើងលើទីលាន ៧២៨ នាទី ខណៈដែលជាមធ្យមកីឡាករទូទៅក៏លើសពី ១ ពាន់នាទីដែរ។
ជាមួយនឹងបញ្ហានេះ James បាននិយាយប្រាប់នៅបទសម្ភាសន៍កន្លងទៅថា៖ “មូលហេតុដែលខ្ញុំមិនបានលេងវាក៏ជាសំណួរល្អដែលខ្ញុំចង់ដឹងដូចគ្នា ដោយជាការពិតទៅពេលអ្នកឈ្នះពានសំខាន់ជាមួយកីឡាករណាហើយ អ្នកប្រាកដជាទុកចិត្តលើកីឡាករនោះ បែបនេះការផ្លាស់ប្តូរវាពិតជាលំបាកណាស់”។
លោកបន្ថែម៖ “តែវាក៏ពិបាកសម្រាប់ខ្ញុំដូចគ្នា ប្រសិនអ្នកចាត់ការគាត់មិនផ្តល់ជូនពេលវេលាទៀងទាត់ ព្រោះវាពិបាកនឹងការដែលយើងអាចបង្ហាញគុណភាពដ៏ល្អនៅនាទីបន្តិចបន្តួចនោះ និយាយទៅមិនអាចធ្វើគ្រប់យ៉ាងអស់ពីខ្លួនបានទេ”។
និយាយជុំវិញរឿង Zidane ខ្សែបម្រើរូបនេះបញ្ជាក់៖ “គ្មានបញ្ហាអ្វីទេរវាងខ្ញុំនិងគាត់ ដោយរាល់គ្រូបង្វឹកទាំងអស់គាត់មានការសម្រេចចិត្តរៀងខ្លួន យ៉ាងណាមិញខ្ញុំនៅតែព្យាយាមហ្វឹកហាត់ ព្រោះពេលដល់ពេលរបស់ខ្ញុំ ខ្ញុំនឹងអាចបង្ហាញទៅបានល្អ”៕
ប្រភព៖ Marca