លោក Zidane អ្នកចាត់ការក្រុម Real Madrid បាននិយាយថាក្រុមអាជ្ញាកណ្ដាលមិនដែលលំអៀង ឬកាន់ជើងក្រុមរបស់លោកតាំងពីដើមមក។២ប្រកួតកន្លងមកនេះ ក្រុម Real Madrid ទទួលបានជ័យជម្នះទាំងពីរប្រកួត ហើយនៅរាត្រីនេះពួកគេនឹងត្រូវប៉ះក្រុម Real Sociedad ទៀតនៅវេលាម៉ោង៣រំលងអាធ្រាត្រនេះ។ ប្រសិនណាបើពួកគេអាចឈ្នះប្រកួតនេះបានទៀត នោះក្រុម Real Madrid នឹងឡើងទៅឈរនៅកំពូលតារាង La Liga ជំនួសតំណែងរបស់ Messi ហើយ។
តែការប្រកួតកន្លងមក ខ្សែការពារ Gerard Pique បានបញ្ជាក់ថាក្រុមអាជ្ញាកណ្ដាលហាក់ដូចជាកាន់ជើងក្រុម Real Madrid ខ្លាំងមែនទែន ជាក់ស្ដែងក្នុងការប្រកួតទល់ក្រុម Valencia កន្លងទៅ។ តែចំពោះរឿងនេះវិញ ត្រូវបាន Zidane ច្រានចោល។ អ្នកចាត់ការរូបនេះ អះអាងថាតាំងពីដើមមក ក្រុមអាជ្ញាកណ្ដាលមិនបាននៅខាងអធិរាជសនោះទេ។ ពួកគេបានកាត់សេចក្ដីទៅតាមអ្វីដែលមើលឃើញជាក់ស្ដែងប៉ុណ្ណោះ៕