អតីតខ្សែការពារ Manchester United លោក Neville បានអះអាងថាក្រុម Liverpool ជោគជ័យមកដល់ពេលនេះ គឺដោយសារតែមានអ្នកចាំទី Alisson ជួយរួមចំណែកយ៉ាងធំធេង។
ក្រុម Liverpool ២រដូវកាលមកនេះ ឃើញថាទទួលបានជោគជ័យច្រើន។ ជាក់ស្ដែងរដូវកាលមុន ពួកគេឈ្នះពានរង្វាន់ UEFA Champions League និងបានលេខ២ក្នុងលីគប្រដេញ Manchester City ។ ខណៈដែលរដូវកាលនេះវិញ ពួកគេកំពុងដាច់ពិន្ទុខ្លាំងក្នុងលីគអង់គ្លេស ដោយរំពឹងថាឈ្នះ២ប្រកួតទៀត គឺលើកពានរង្វាន់ Premier League ជាថ្មីម្ដងទៀត ក្នុងរយៈពេល៣០ឆ្នាំចុងក្រោយនេះ។
ការធ្វើបានល្អនេះ ត្រូវបាន Gary Neville ឱ្យគុណសម្បត្តិទៅអ្នកចាំទី Alisson ច្រើនជាងខ្សែការពារ Virgil van Dijk ទៅទៀត។ អតីតកីឡាករ Man Utd យល់ឃើញថា៖ “ខ្ញុំគិតថា Alisson ជាអ្នកធ្វើឱ្យ Liverpool ឈ្នះពានរង្វាន់លីគ។ មនុស្សជាច្រើនមើលឃើញ Van Dijk ប៉ុន្តែសម្រាប់ខ្ញុំមិនដូច្នេះទេ។ ក្រុម Liverpool មានបញ្ហាអ្នកចាំទីច្រើនឆ្នាំមកហើយ ពេល Alisson ចូលមកដល់ គ្រប់យ៉ាងបានប្រែប្រួល។ ពេលអ្នកមានអ្នកចាំទីល្អ សង្គ្រោះបាល់គ្រោះថ្នាក់បានច្រើនហើយ នោះវានឹងផ្ដល់ទំនុកចិត្តកាន់តែខ្លាំងដល់ក្រុម ដើម្បីស្វែងរកជ័យជម្នះក្នុងការប្រកួតបាន”៕ប្រភព Goal
