ខ្សែការពារ Jodi Alba បានហៅការប្រកួតដែល Barcelona យកឈ្នះលើក្រុម Mallorca ៤-០ នៅយប់មិញ ជាការប្រកួតដ៏អស្ចារ្យមួយសម្រាប់ក្រុមក្នុងការបើកលីគ La Liga ។កីឡាករអេស្ប៉ាញខាងលើនេះ រកបាន១គ្រាប់ឱ្យក្រុម Barcelona ផងដែរ ក្នុងចំណោម៤គ្រាប់ដែលកើតមានឡើង។ កីឡាករវ័យ៣១ឆ្នាំខាងលើបាននិយាយក្រោយចប់ការប្រកួតថា៖ “យើងបានគ្រប់គ្រងការប្រកួតនេះ។ ក្រុមទាំងមូលលេងបានល្អ បន្ទាប់ពីខកខានលេងរយៈពេល៣ខែមកហើយ។ យើងរកបានគ្រាប់បាល់តាំងពីនាទីដំបូង ដែលវាបានផ្ដល់ទំនុកចិត្តកាន់តែខ្លាំងដល់យើង”។
ក្រុម Barcelona ក្នុងការបើករដូវកាលវិញនេះ មានកីឡាករពេញជើងល្អតែម្ដង ដោយសូម្បីតែ Suarez ក៏អាចចូលលេងវិញបានផងដែរ។ ពួកគេកំពុងនាំមុខកំពូលតារាង ៥ពិន្ទុពីក្រុម Real Madrid ដែលសល់១ប្រកួតក្នុងដៃ៕
ប្រភព៖ Marca
