អ្នកចាំទី Loris Karius បានបញ្ជាក់ថានឹងមិនទៅក្លឹបណាទៀតទេ ហើយប្រឹងប្រែងហ្វឹកហាត់ដើម្បីប្រជែងយកកៅអីលេងវិញថែមទៀត។អ្នកចាំទីវ័យ២៦ឆ្នាំ ទើបតែត្រលប់មកក្រុម Liverpool វិញ ក្រោយពីក្រុម Besiktas បានកាត់ការខ្ចីជើងរបស់គេ។ មូលហេតុដែលប្រញាប់ឱ្យត្រលប់មកវិញនេះ គឺដោយសារតែ Karius បានឈ្លោះប្រកែកជាមួយថ្នាក់ដឹកនាំក្លឹប ចំពោះរឿងប្រាក់ខែ។
កីឡាករសញ្ជាតិអាល្លឺម៉ង់នេះ ក៏មានក្លឹបដទៃចង់បានដែរ តែពេលនេះសាមីខ្លួនបញ្ជាក់ថាលែងចង់ទៅក្លឹបណាទៀតហើយ។ Karius ថានឹងបន្ដនៅក្រុមហង្សក្រហម ដើម្បីព្យាយាមហ្វឹកហាត់ឱ្យខ្លាំង ប្រជែងយកកៅអីជម្រើស១១នាក់ដំបូងវិញ ដូចដែលរូបគេធ្លាប់ធ្វើបានកន្លងមក។
អ្នកចាំទីខាងលើនេះ ត្រូវបានអ្នកគាំទ្រក្រុម Liverpool ខកបំណងយ៉ាងខ្លាំង បន្ទាប់ពីរូបគេមានកំហុសធ្វើឱ្យរបូតគ្រាប់បាល់២គ្រាប់ ក្នុងការប្រកួត UEFA Champions League វគ្គផ្ដាច់ព្រ័ត្រ។ នៅឆ្នាំនោះ ក្រុម Liverpool លេងចាញ់ក្រុម Real Madrid ក្នុងលទ្ធផល ៣-១៕
ប្រភព៖ DailyMail