ខ្សែប្រយុទ្ធ Antoine Griezmann ចង់ក្លាយជាតួអង្គសំខាន់ម្នាក់ក្នុងក្រុម FC Barcelona នៅពេលខាងមុខនេះ បើទោះជាបច្ចុប្បន្នរូបគេធ្វើមិនសូវបានល្អក៏ដោយ។
កីឡាករបារាំង រងសម្ពាធពីអ្នកគាំទ្រច្រើននៅរដូវកាលដំបូងរបស់ខ្លួននេះ ដោយសារតែធ្វើមិនទាន់បានល្អនៅឡើយ។ តែបើទោះជាយ៉ាងនេះក្ដី អតីតខ្សែប្រយុទ្ធរបស់ក្រុម AT Madrid នៅតែមានទំនុកចិត្តថាខ្លួននឹងជោគជ័យជាមួយក្រុមអ្នកមានបុណ្យនេះ ជាពិសេសបានធ្វើជាមនុស្សសំខាន់មិនអាចខ្វះបានសម្រាប់ក្រុមទៅថ្ងៃអនាគត។
Griezmann បាននិយាយថា៖ “ខ្ញុំចង់ក្លាយជាផ្នែកសំខាន់សម្រាប់ក្លឹបទាំងនៅលើទីលាន និងក្រៅទីលាន។ រីករាយជាមួយបាល់ទាត់ និងជួយក្រុមឱ្យឈ្នះពានរង្វាន់គ្រប់យ៉ាង គ្រប់ការប្រកួត។ ខ្ញុំគិតថាការគិតល្អពីខ្លួន គឺជារឿងល្អសម្រាប់លើកទឹកចិត្ត ខ្ញុំនឹងប្រឹងប្រែងបន្ដទៅមុខទៀត”៕ប្រភព Marca
