លោក Setien អ្នកចាត់ការក្រុម FC Barcelona បានអះអាងថា Lionel Messi មិនមានបញ្ហារបួសអ្វីធ្ងន់ធ្ងរនោះទេ ហើយអាចនឹងលេងបានក្នុងការប្រកួតបើកឆាក។
ប្រធានក្រុមអ្នកមានបុណ្យបានរងរបួសសរសៃពួរកាលពីពេលកន្លងទៅ ហើយខកខានមិនបានចូលរួមហ្វឹកហាត់ជាមួយសមាជិកក្រុមដទៃទៀតទេ។ យ៉ាងណាមិញនៅពេលនេះ Messi បានហាត់វិញតិចៗហើយនៅលើទីលាន និងមិនមានបញ្ហាធ្ងន់ឡើយ។ បើតាមលោក Setien ដែលជាអ្នកចាត់ការក្រុម អះអាងថានៅពេលបើកឆាកខាងមុខ Messi អាចលេងបាន។
លោក Setien បាននិយាយថា៖ “វាមិនមែនតែ Messi ទេ កីឡាករដទៃទៀតក៏មានបញ្ហារបួសដែរ។ នេះមកពីការសម្រាកនៅផ្ទះយូរពេក នៅពេលយើងត្រលប់មកវិញតែងតែមានបញ្ហា។ តែនេះមិនមែនជាអ្វីដែលប្លែកឡើយ វាគ្រាន់តែជារបួសតិចតួចប៉ុណ្ណោះ។ Messi បានធូរស្បើយ និងបច្ចុប្បន្ននេះមិនមានបញ្ហាទេ”៕ប្រភព Marca
