Bruno Fernandes បាននិយាយថារូបគេកំពុងរង់ចាំលីគបើកដំណើរការវិញ ដើម្បីបានចាប់ដៃគូជាមួយ Paul Pogba នៅលើទីលាន។
ខ្សែបម្រើ Bruno បានចូលរួមជាមួយក្រុម Manchester United កាលពីខែមករាកន្លងទៅ គ្រាដែល Pogba កំពុងមានរបួសសម្រាកនៅឡើយ។ វត្តមានរបស់កីឡាករព័រទុយហ្គាល់បានជួយដល់ក្រុមលោក Ole បានច្រើនមែនទែន រហូតដល់បច្ចុប្បន្ននេះអ្នកគាំទ្រជាច្រើនចាត់ទុក Bruno ជាតួរអង្គសំខាន់ផ្លាស់ប្ដូរការប្រកួតទៅហើយ។
ដោយឡែកសម្រាប់ការបើកលីគវិញនៅថ្ងៃទី១៧ខែមិថុនាឆ្នាំ២០២០ខាងមុខនេះវិញ Pogba ដែលរងរបួសជិត១រដូវកាលមកហើយនោះ អាចចូលលេងវិញបានហើយ។ រូបគេកំពុងហ្វឹកហាត់ជាមួយសមាជិកក្រុមដទៃទៀត ដើម្បីត្រៀមចូលលេងវិញ។ វត្តមានរបស់កីឡាករបារាំងនេះ ធ្វើឱ្យ Bruno និយាយថា៖ “ខ្ញុំមិនអាចរង់ចាំដើម្បីលេងជាមួយ Pogba ទេ។ គាត់ជាកីឡាករល្អបំផុតម្នាក់នៅលើលោកនេះ។ គាត់របួសយូរមកហើយ ការបានលេងជាមួយគាត់គឺជាពេលវេលាអស្ចារ្យបំផុត ហើយខ្ញុំពិតជាចង់ឱ្យវាមកដល់ឆាប់ៗនេះណាស់”៕ប្រភព Dailymail