ភ្នាក់ងារ​របស់ Werner ឲ្យ​តម្រុយ​ពី​ក្លឹប​ថ្មី តែ​មិនមែន Man Utd និង Chelsea

ភ្នាក់ងារ​រត់ការ​របស់​កីឡាករ Timo Werner បាន​បង្ហើប​តម្រុយ​ចំៗ​តាម​រយៈ​កិច្ច​សម្ភាសន៍​នៅ​លើ​ប្រព័ន្ធ​ផ្សព្វផ្សាយ​ Transfer Window Podcast ថា ​កីឡាករ​របស់​ក្លឹប RB Leipzig រូប​នេះ គឺ​កាន់​តែ​កៀក​ជិត​ក្នុង​ការ​ផ្ទេរ​ទៅ​កាន់​ក្លឹប Liverpool ហើយ។

នេះ​ជា​ដំណឹង​អាក្រក់​មួយ​សម្រាប់​អ្នក​គាំទ្រ​របស់​ក្លឹប​តោ​ខៀវ Chelsea និង​បិសាច​ក្រហម Man Utd ដែល​កន្លង​មក​ក៏​ល្ហេចល្ហៀង​ថា​ក្លឹប​ទាំង​ពីរ​ចង់​បាន Werner ចេញ​ពី​ទឹកដី​អាល្លឺម៉ង់​ផង​ដែរ។

ប្រភព​បាន​ឲ្យ​ដឹង​ថា ភាគី​ខាង​កីឡាករ​និង​ក្លឹប​គឺ​ព្រមព្រៀង​លើ​ការ​ចរចា​ហើយ នៅ​ឡើយ​តែ​ភាគី​រវាង​ក្លឹប​និង​ក្លឹប ជាមួយ​តម្លៃ​កីឡាករ​តែ​ប៉ុណ្ណោះ។

សម្រាប់​ការ​ចរចា​របស់​ក្លឹប​ Liverpool ជាមួយ​នឹង Werner ផ្ទាល់ គឺ​ផ្តល់​ជូន​ថ្លៃ​ពលកម្ម ១៤០ ០០០ ផោន/សប្តាហ៍​សម្រាប់​កុងត្រា​រយៈ​ពេល ៥ ឆ្នាំ។ ដោយឡែក​សម្រាប់​តម្លៃ​ផ្ទេរ​ចេញ​គឺ​មិន​ទាន់​ចរចា​ត្រូវរ៉ូវ​គ្នា​ជាមួយ Leipzig នៅ​ឡើយ៕

ប្រភព៖ Metro

ភ្ជាប់ទំនាក់ទំនងជាមួយ CTS SPORT