អតីតកីឡាករជើងចាស់លោក Willy Sagnol បានបង្ហាញការយល់ឃើញថា ផែនការណ៍ចង់នាំយក Leroy Sane មកកាន់ទឹកដីអាល្លឺម៉ង់របស់ក្លឹប Bayern Munich គឺជារឿងដែលមិនគួរនឹងកើតឡើងនោះទេ។
Willy បាននិយាយប្រាប់ Radio Monte Carlo ថា៖ “Sane គេជាកីឡាករមិនទៀងទាត់ទេ ពោលគឺគ្រប់យ៉ាងរបស់គេមិនសក្តិសមនឹងការលេងឲ្យក្លឹប [Bayern] ឡើយ ដោយគេក៏មានបញ្ហាច្រើននៅ City និងនៅជម្រើសជាតិអាល្លឺម៉ង់”។
លោកបន្ថែមថា៖ “យើងធ្លាប់និយាយថា Sane គេថ្លៃ ៨០ លាន អ៊ីចឹងខ្ញុំសុខចិត្តថែម ២០ លានទៀតនាំយក Kai Havertz មកគឺល្អជាង”។
បញ្ជាក់ថា Sane បានរងបញ្ហារបួសធ្ងន់ធ្ងរនៅ City រដូវកាលនេះ ខណៈដែលកុងត្រារបស់គេត្រូវផុតនៅឆ្នាំ ២០២១។ បើធៀបនឹង Havertz នារដូវកាល ២០១៩/២០ គឺយុវជនវ័យ ២០ ឆ្នាំ រកបាន ១៥ គ្រាប់និង Assist ៨ លើកហើយនៅ ៣៨ ប្រកួតសរុបឲ្យក្លឹប Bayer Leverkusen៕
ប្រភព៖ BeSoccer