Andy Murray ជាកំពូលកីឡាករវាយកូនបាល់នៅលើលោកនេះ កាលពីប៉ុន្មានឆ្នាំមុន ប៉ុន្តែដោយសារតែមានរបួសច្រើនពេក ពេលនេះរូបគេបានធ្លាក់សមត្ថភាពខ្លាំងមែនទែន។
កីឡាករវាយកូនបាល់អង់គ្លេស បានធ្លាក់មកដល់បាតតារាងលេខ៨៣៩ពិភពលោកតែម្ដង ខណៈដែលរូបគេកាលពីមុនឈរនៅចំណាត់ថ្នាក់លេខ១ពិភពលោក។ ការធ្លាក់ខ្លាំងនេះបន្ទាប់ពីរូបគេបានដកខ្លួនចេញពីពានរង្វាន់ Wimbledon។ ជំងឺដែលញ៉ាំញីសមត្ថភាពរបស់កីឡាករវ័យ៣១ឆ្នាំរូបនេះ គឺបញ្ហាត្រគាករបស់គេ ដែលបានវះកាត់កាលពីខែមករាកន្លងទៅ។ ការវះកាត់នេះហើយ បានធ្វើឱ្យរូបគេត្រូវសម្រាកជាច្រើនខែនិងមិនបានចូលលេងពានរង្វាន់យ៉ាងច្រើន ទើបធ្វើឱ្យចំណាត់ថ្នាក់ធ្លាក់ខ្លាំងយ៉ាងនេះ។
យ៉ាងណាមិញ Murray នឹងត្រលប់មកលេងពានរង្វាន់ Citi Open ដែលនឹងចាប់ផ្ដើមនៅថ្ងៃទី ៣០ ខែ កក្កដា ឆ្នាំ ២០១៨ខាងមុខនេះវិញ។ ហើយបើមិនមានអ្វីប្រែប្រួលទេ រូបគេក៏អាចនឹងមានវត្តមានក្នុងការប្រកួតពានរង្វាន់ US Open នៅខែសីហាខាងមុខថែមទៀតផង៕ប្រភព៖ BBC
