ក្រុម Spurs មានបំណងចង់ខ្ចីជើងខ្សែបម្រើប្រយុទ្ធ Coutinho ពីក្រុម Barcelona នៅរដូវកាលក្រោយនេះ បន្ទាប់ពីមិនមានលទ្ធភាពទិញយកដាច់តែម្ដង។Coutinho ត្រូវបានក្រុម Barcelona ដាក់លក់តាំងពីពាក់កណ្ដាលរដូវកាលមុន ប៉ុន្តែរហូតមកដល់ពេលនេះមិនទាន់មានក្រុមណាមួយហ៊ានចេញមុខទិញយកឡើយ។ កត្តាធ្លាក់ទម្រង់លេងខ្លាំង គឺជាបញ្ហាចំបងដែលមិនមានក្រុមណាមួយចង់បាននោះទេ។ មួយវិញទៀត តម្លៃខ្លួនវិញក៏ក្រុមអ្នកមានបុណ្យដាក់ខ្ពស់ខ្លាំងពេក រហូតដល់៥០លានផោនឯណោះ។
មួយរយៈនេះ មានក្លឹបនៅអង់គ្លេសច្រើនចេញមុខថាចង់បានកីឡាករប្រេស៊ីលខាងលើ។ ដោយឡែកនៅក្នុងនោះក៏មាន Spurs មួយផងដែរ។ ក្រុមដែលដឹកនាំដោយលោក Jose Mourinho ចង់ខ្ចីជើងអតីតកីឡាករ Liverpool នេះនៅរដូវកាលក្រោយ។ ការចង់ខ្ចីជើងនេះ ក៏ព្រោះថាពួកគេមិនមានប្រាក់ច្រើនដើម្បីទិញយកដាច់នោះទេ។ តម្លៃខ្ចីជើង១រដូវកាល ត្រូវបានគេដឹងថា១០លានផោន៕
ប្រភព៖ Marca
