លោក Heimir Hallgrimsson បានប្រកាសលាឈប់ពីតំណែងគ្រូបង្វឹកក្រុមបាល់ទាត់ជម្រើសជាតិអ៊ីស្លង់ហើយ ដោយលោកចង់បន្ដអាជីពជាពេទ្យធ្មេញវិញ។
បុរសវ័យ៥១ឆ្នាំខាងលើនេះ បានចូលកាន់តំណែងដំបូងនៅឆ្នាំ២០១៦ គ្រាដែលអ៊ីស្លង់ចូលលេងពានរង្វាន់ Euro 2016 និងបានបង្កើតកំណត់ត្រាជាច្រើន ធ្វើឱ្យគេស្គាល់សឹងទូទាំងប្រទេស។ មិនត្រឹមតែប៉ុណ្ណោះ លោក Heimir Hallgrimsson បានដឹកនាំក្រុមអ៊ីស្លង់បន្ដទៀត រហូតដល់ World Cup ឆ្នាំនេះ បើទោះជាធ្វើមិនបានល្អក៏ដោយ ក៏លោកអាចនាំអ៊ីស្លង់លេងស្មើជាមួយអាហ្សង់ទីនក្នុងពូលផងដែរ។
កំណត់ត្រាធ្វើល្អយ៉ាងនេះ បានធ្វើឱ្យអ៊ីស្លង់ចង់តកុងត្រាជាមួយលោកទៀត ដើម្បីដឹកនាំក្រុមបន្ដ ព្រោះថាកុងត្រាចាស់ដែលចុះតាំងពីឆ្នាំ ២០១៦នោះនឹងផុតនៅពេលខាងមុខនេះហើយ។ ត្បិតតែទ្វានៅតែបើកសម្រាប់លោកនៅដឹកនាំក្រុមជម្រើសជាតិមែន ប៉ុន្តែ Hallgrimsson បានប្រកាសថាលោកលាឈប់ហើយ មិនបន្ដទៀតទេ។ បុរសរូបនេះ នឹងត្រលប់ទៅធ្វើជាពេទ្យធ្មេញដែលជាអាជីពខ្លួនស្រលាញ់ខ្លាំងនោះវិញ។
សូមបញ្ជាក់ថាមុនចូលដឹកនាំក្រុមជម្រើសជាតិអ៊ីស្លង់នេះ លោក Hallgrimsson មានមុខរបរមួយជាពេទ្យធ្មេញក្នុងប្រទេសអ៊ីស្លង់។ ការមកដឹកនាំក្រុមជម្រើសជាតិនេះ គឺជារឿងមួយដែលលោកចង់ធ្វើនៅគ្រាមុន ប៉ុន្តែពេលនេះលោកចង់ឱ្យមានអ្នកថ្មីមកដឹកនាំ ដើម្បីជោគជ័យជាងលោក៕ប្រភព៖ MARCA
