លោក Florentino Perez បានបង្ហើបប្រាប់អ្នកគាំទ្រ Real Madrid ថានៅទីផ្សារដោះដូរកីឡាករនេះ ក្លឹបនឹងសម្រេចទិញយកកំពូលកីឡាករម្នាក់មករួមក្រុមវិញ បន្ទាប់ពី Cristiano Ronaldo ចាកចេញ។
ការចាកចេញរបស់ Ronaldo បានធ្វើឱ្យក្រុម Real Madrid បាត់បង់អ្នកគាំទ្រជាច្រើន ត្បិតអីកំពូលកីឡាករម្នាក់បានបាត់ចេញពីក្រុមទៅហើយ។ យ៉ាងណាមិញ លោក Perez ដែលជាប្រធានក្លឹបផ្ទាល់បានបង្ហើបរឿងសប្បាយចិត្តមួយទៅកាន់អ្នកគាំទ្រ។ ដោយលោកបង្ហើបថានឹងមានការទិញយកកីឡាករកំពូលម្នាក់មករួមក្រុមវិញ ហើយដំណើរការនោះ កំពុងស្ថិតក្នុងការចរចានៅឡើយ។
គេមិនទាន់ដឹងច្បាស់ថាសម្ដីរបស់លោក Perez ខាងលើចង់សំដៅទៅលើកីឡាកររូបណានៅឡើយទេ។ ដោយបច្ចុប្បន្ននេះមានប្រភពជាច្រើនចុះផ្សាយមិនច្បាស់លាស់ឡើយ។ កាសែតនៅបារាំង ថា Real Madrid ចង់បាន Neymar ដើម្បីជំនួសតំណែងរបស់ Ronaldo ។
កាសែតបែលហ្សិក បានសរសេរចំណងជើងយ៉ាងធំថា Eden Hazard ជាបេក្ខភាពល្អបំផុតសម្រាប់ Real Madrid ទិញយកទៅជំនួស Ronaldo ។ ខណៈដែលកាសែតនៅអង់គ្លេសវិញ Harry Kane ក៏ជាកីឡាករកំពូលម្នាក់មានលក្ខណៈសម្បត្តិគ្រប់គ្រាន់ដើម្បី លេងឱ្យអធិរាជសដែរ៕ប្រភព៖ DailyMail