សហព័ន្ធវាយកូនឃ្លីលើតុកម្ពុជាចាប់ផ្តើមប្រមូលផ្តុំក្រុមថ្នាលឡើងវិញត្រៀមប្រកួតយុវជនអាស៊ីនៅប្រទេសឡាវ

សហព័ន្ធកីឡាវាយកូនឃ្លីលើតុកម្ពុជាបានចាប់ផ្តើមប្រមូលផ្តុំពង្រឹងបច្ចេកទេសកីឡាករថ្នាលរបស់ខ្លួនវិញហើយ ដើម្បីចូលរួមប្រកួតប្រជែងជើងឯកយុវជនអាស៊ីនៅប្រទេសឡាវ នាខែសីហាឆ្នាំ២០២០។

លោក ស៊ុន សុធារិទ្ធ អគ្គលេខាធិការសហព័ន្ធវាយកូនឃ្លីលើតុកម្ពុជាបានបញ្ជាក់ឱ្យដឹងកាលពី​ថ្ងៃទី​២១ ខែឧសភា ឆ្នាំ២០២០នេះថា សហព័ន្ធបានចាប់ផ្តើមពង្រឹងសមត្ថភាពបច្ចេកទេសកីឡាករ កីឡាការិនី​ជាលក្ខណៈក្រុមតូចៗនោះទេ ដោយតែយើងចូលរួមទប់ស្តាត់ការពារជំងឺកូវីដ-១៩ តាមសេចក្តីណែនាំរបស់​ក្រសួង​អប់រំយុវជន និងកីឡា។ លោកបានលើកឡើងថា ការពង្រឹងបច្ចេកទេសនេះ គឺដើម្បីឱ្យមានសមត្ថភាព​គ្រាប់គ្រាន់ក្នុងការប្រជែងនោះ សហព័ន្ធចាំបាច់ត្រូវតែស្នើរសុំឱ្យមានការហ្វឹកហាត់ជាក្ខណៈក្រុមតូចៗ ដែល​មានការជុំគ្នាមិនលើសពី០៤នាក់ជាមួយនឹងការការពារប្រុងប្រយ័ត្នខ្ពស់ ដោយមានការការពារអនាម័យ និង​វាស់​កម្តៅផងដែរ។

អគ្គលេខាធិការរូបនេះបានពន្យល់ថា ប្រសិនបើការហ្វឹកហាត់ធ្វើនៅផ្ទះ គឺយើងពង្រឹងបានតែកម្លាំង​កាយប៉ុណ្ណោះ ប៉ុន្តែការកាហ្វឹកហាត់ជាក្រុមតូចៗនៅសហព័ន្ធយើងហ្វឹកហាត់បានទាំងកម្លាំងកាយ និង​បច្ចេក​ទេស ត្បិតមានគ្រូជួយបង្ហាត់ណែនាំ ដែលជួយជំរុញឱ្យសមត្ថភាពអត្តពលិកអភិវឌ្ឍន៍ឈាន​ទៅរកការប្រកួត​ប្រជែងប្រកបដោយគុណភាពល្អប្រសើរ។

ការប្រកួតយុវជនអាស៊ីលើប្រភេទកីឡាវាយកូនឃ្លីលើតុនេះមានប្រទេសខ្លាំងៗចូលរួម​ប្រកួត​ប្រជែងមេដាយ ដូចជាមានអត្តពលិកយុវជនមកពីសាធារណរដ្ឋប្រជាមានិតចិន ជប៉ុន និងកូរ៉េជាដើម ហើយសម្រាប់កម្ពុជាបានត្រៀមយុវជន៦នាក់ចូលរួមប្រកួតនៅក្នុងព្រឹត្តិការណ៍អន្តរជាតិនេះ ក្នុងនោះមាន​យុវជនក្រោមអាយុ១៨ ចំនួន០៤នាក់ និងក្រោមអាយុ១៥ឆ្នាំ មានចំនួន០២នាក់៕

ភ្ជាប់ទំនាក់ទំនងជាមួយ CTS SPORT