ក្លឹប Napoli ក្រោមការដឹកនាំរបស់លោក Carlo Ancelotti ចង់បាន Karim Benzema ពីក្លឹប Real Madrid ក្នុងតម្លៃខ្លួន៤០លានផោន។
Napoli ដែលជាក្លឹបធំមួយប្រជែងពានរង្វាន់ Serie A ជាមួយក្រុម Juventus នោះ កំពុងតែស្វែងរកខ្សែប្រយុទ្ធថ្មីបន្ថែមទៀត ស្របពេលសេះបង្កង់យកបាន Ronaldo មកហើយនោះ។ Benzema ជាខ្សែប្រយុទ្ធដែលលោក Ancelottti ទុកចិត្តកាលគ្រាធ្វើការជាមួយគ្នានៅ Real Madrid នោះ គឺជាគោលដៅធំមួយសម្រាប់ Napoli ទិញយកនៅរដូវកាលនេះ។
យ៉ាងណាមិញ ការចង់បាននេះហាក់ដូចជាពិបាកបន្តិច ត្បិតអីក្លឹប Real Madrid មិនទាន់រកបានខ្សែប្រយុទ្ធនៅឡើយ ក្រោយការចាកចេញរបស់ Ronaldo ។ អធិរាជស កំពុងសម្លឹងឃើញ Eden Hazard របស់ Chelsea ដែលកំពុងតែចង់មកក្រុង Madrid ស្រាប់ ប៉ុន្តែក្នុងនោះពួកគេក៏ឃើញ Rodrigo ខ្សែប្រយុទ្ធរបស់ Valencia ដែលរកបាន១៦គ្រាប់នៅ La Liga នារដូវកាលមុនផងដែរ។
ដូច្នេះហើយ Benzema រកបាន១៩២គ្រាប់ ក្នុងការបង្ហាញខ្លួន៤១៣ប្រកួតឱ្យ Real Madrid នោះ អាចនឹងចាកចេញបាន ប្រសិនណាបើក្លឹបរកបានកីឡាករថ្មីមកសិន៕ប្រភព៖DailyMail
