Adrian Mariappa បានប្រកាសថាខ្លួនជាកីឡាករក្នុងក្រុម Watford ម្នាក់ដែលមានផ្ទុកមេរោគ Covid-19 ក្រោយពីបានធ្វើតេស្ដកាលពីពេលកន្លងទៅ។
ក្របខណ្ឌ Premier League កាលពីម្សិលមិញនេះ បានប្រកាសថាមានកីឡាករ៦នាក់រកឃើញមានផ្ទុកមេរោគ Covid-19 ។ ដោយក្នុងនោះមាននៅក្រុម Watford ៣នាក់ Burnley ម្នាក់ និង២នាក់ទៀតនៅក្រុមមួយដែលមិនទាន់បង្ហាញឈ្មោះនៅឡើយ។ ដោយក្នុងចំណោម៣នាក់របស់ក្រុម Watford នោះ ត្រូវបានទម្លាយឈ្មោះម្នាក់ហើយគឺកីឡាករ Adrian Mariappa ។
ការទម្លាយឈ្មោះនេះ គឺធ្វើឡើងដោយសាមីខ្លួនផ្ទាល់តែម្ដង។ Adrian Mariappa បាននិយាយថាខ្លួនមិនអស់ចិត្តនោះទេ ចំពោះការឆ្លងមេរោគ Covid-19 នេះ ដោយសារតែតាំងពីដំបូងមក រូបគេមិនដែលចេញក្រៅ ឬមានកម្មវិធីជប់លៀងអ្វីឡើយ ពោលគឺនៅតែក្នុងផ្ទះប៉ុណ្ណោះ។ តែហេតុអ្វីបានជាឆ្លងមេរោគនេះទៅកើត? តែយ៉ាងណា កីឡាករសញ្ជាតិចាម៉ៃការូបនេះ ថាខ្លួនមានសុខភាពល្អធម្មតា មិនមានចេញរោគសញ្ញាអ្វីនោះទេ។ ដូច្នេះរំពឹងថានឹងតេស្ដអវិជ្ជមានវិញក្នុងពេលឆាប់ៗខាងមុខ៕ប្រភព Skysports
