អ្នកចាំទី Courtois បានអះអាងថាក្រុម Real Madrid នឹងប្រឹងប្រែងខ្លាំងបំផុតសម្រាប់ប្រកួតនៅសល់ ដើម្បីប្រជែងយកពានរង្វាន់ La Liga ពីក្រុម FC Barcelona ។
Courtois នារដូវកាលនេះ ធ្វើបានល្អជាងកាលផ្លាស់មកដំបូង។ រូបគេបានជួយរក្សាសំណាញ់ទីក្រុមអធិរាជសបានច្រើន រហូតដល់បច្ចុប្បន្ននេះកំពុងប្រជែងជាមួយក្រុមអ្នកមានបុណ្យដែលឈរនៅកំពូលតារាង មាន២ពិន្ទុលើសក្រុម Real Madrid ។ ដោយឡែកសម្រាប់ការត្រៀមបើកប្រកួតឡើងវិញនាពេលខាងមុខនេះដែរ ត្រូវបានអ្នកចាំទីសញ្ជាតិបែលហ្សិកមើលឃើញថាជាឱកាសល្អ សម្រាប់ Real Madrid ដើម្បីប្រជែងពាន។
“បន្ទាប់ពីរយៈពេល២ខែដែលយើងមិនបានហាត់ យើងពិតជាមិនអាចរង់ចាំបានទេក្នុងការត្រលប់មកវិញ។ វាខុសគ្នាឆ្ងាយរវាងការហាត់នៅផ្ទះ និងហាត់នៅទីលានជុំគ្នា។ យើងនឹងប្រឹងប្រែងសម្រាប់ការប្រកួតនាពេលខាងមុខនេះ ដើម្បីប្រជែងយកពានរង្វាន់ La Liga ។ វាជាគោលដៅធំសម្រាប់យើងនារដូវកាលនេះ”។ សម្ដីអតីតអ្នកចាំទី Chelsea និយាយ៕ប្រភព Marca
