ក្រុម Real Madrid បានប្រមូលផ្ដុំគ្នាហ្វឹកហាត់ឡើងវិញហើយ ក្រោយពីខកខានជាច្រើនសប្ដាហ៍ដោយសារតែមេរោគ Covid-19 វាយលុកខ្លាំង។
ការត្រលប់មកហ្វឹកហាត់វិញនេះដែរ កីឡាករក្រុម Real Madrid ហាក់ដូចជាមិនទាន់លេងត្រូវគ្នានោះទេ។ ដោយសូម្បីតែការគ្រប់គ្រងបាល់ក៏មិនទាន់បានល្អ ដូចធម្មតាផងដែរ។ Dani Carvajal ខ្សែការពាររបស់ក្រុមអធិរាជស បាននិយាយថាក្រុមទាំងមូលនៅរឹងជើងនៅឡើយ មិនទាន់អាចលេងបានល្អវិញនោះទេ។ ពួកគេត្រូវការពេលវេលាទៀត ទើបអាចត្រលប់មករកភាពធម្មតាវិញ។
រំលឹកថាការប្រកួត La Liga ត្រូវបានរដ្ឋាភិបាលអេស្ប៉ាញយល់ព្រមឱ្យបើកការប្រកួតឡើងវិញហើយ ប៉ុន្តែត្រូវលេងដោយគោរពលក្ខខណ្ឌជាច្រើន ក្នុងនោះក៏មានលេងដោយបិទទ្វាផងដែរ។ គេរំពឹងថាប្រសិនបើគ្រប់ក្លឹបទាំងអស់ បានហ្វឹកហាត់ដិតដល់ នោះការប្រកួតអាចនឹងធ្វើឡើងវិញនៅពាក់កណ្ដាលខែក្រោយនេះ៕ប្រភព Marca