អគ្គលេខាធិការគណៈកម្មាធិការជាតិប៉ារ៉ាឡាំពិកកម្ពុជាបញ្ជាក់ជុំវិញហ្វីលីពីនលុបចោលអាស៊ានប៉ារ៉ាហ្គេមលើកទី១០

ឯកឧត្តម យី វាសនា អគ្គលេខាធិការគណៈកម្មាធិការជាតិប៉ារ៉ាឡាំពិកកម្ពុជា (NPCC) បានបញ្ជាក់នៅថ្ងៃទី១៥ ខែឧសភា ឆ្នាំ២០២០នេះ ជុំវិញករណីដែលម្ចាស់ផ្ទះហ្វីលីពីនលុបចោលការប្រកួតកីឡាអាស៊ានប៉ារ៉ាហ្គេម លើកទី១០ ដែលបន្តពន្យាពេលដល់ខែតុលា ឆ្នាំ២០២០។

ឯកឧត្តម យី វាសនា បញ្ជាក់ជូនថា៖ នៅក្នុងលិខិតឆ្លើយឆ្លងរបស់គណៈកម្មការកីឡាប្រទេសហ៊្វីលីពីន និងគណៈកម្មាធិការរៀបចំការប្រកួតកីឡាអាស៊ានប៉ារ៉ាហ្គេមហ្វីលីពីន នៅក្នុងខ្លឹមសារនេះបានប្រើប្រាស់ត្រឹមពាក្យថា នឹង ឬអាច នឹងលុបចោល មិនទាន់ច្បាស់ថា លុបចោល១០០ភាគរយនោះនៅឡើយទេ។ ដោយគ្រោងនឹងពិភាក្សាឡើងវិញនាខែកក្កដា ឆ្នាំ២០២០នេះថា តើត្រូវលុបចោលទាំងស្រុង ឬយ៉ាងណានោះទេ។ ដូច្នេះហើយទើបគណៈកម្មាធិការជាតិប៉ារ៉ាឡាំពិកកម្ពុជា មិនទាន់ចេញលិខិតផ្លូវការសម្រាប់កម្ពុជានៅឡើយដែរ ដោយរង់ចាំពិនិត្យមើលនិតីវិធី និងការសម្រេចចុងក្រោយរបស់ម្ចាស់ផ្ទះ ហ៊្វីលីពីន”។

លោកបានបន្ថែម​ថា៖​«ខ្ញុំនឹងធ្វើសេចក្តីប្រកាសឆាប់ៗនេះ ដោយនៅក្នុងលិខិតរបស់ហ៊្វីលីពីន លើចំណុច៣ និងចំណុច៤ ពាក់ព័ន្ធគ្នា ដែលពិនិត្យទៅស្ទើរតែ៩០ភាគរយ ដែលមានទំនោរឈានទៅរកការលុបចោលនោះដោយរង់ចំាមើលថា តើអាស៊ានប៉ារ៉ាហ្គេម លើកទី១០នេះ លើកទៅឆ្នាំ២០២១ ឬត្រូវគេលុបចោលទាំងស្រុងតែម្តង ឬត្រូវម្ចាស់ផ្ទះវៀតណាមត្រូវទទួលយកនូវ ព្រឹត្តិ ការណ៍លើកទី១០នេះ ឬលើកទី១១។ នេះជាគឺជាប្រវត្តិសាស្ត្រមួយ ដែលជាគ្រោះថ្នាក់មួយនៃវិបត្តិជំងឺឆ្លងកូវីដ-១៩នេះ ដែលធ្វើឱ្យម្ចាស់ផ្ទះ ហ៊្វីលីពីនខ្វះខាតក្នុងការប្រើប្រាស់ថវិកា ហើយបានបង្វែរថវិកាកីឡានេះទៅប្រើប្រាស់ក្នុងការប្រយុទ្ធប្រឆាំងនឹងជំងឺកូវីដ-១៩ នេះផងដែរ »។

កន្លងមកថ្មីៗនេះមានសារព័ត៌មានមួយចំនួន បានផ្សព្វផ្សាយអំពីការលុបចោលនេះទាំងស្រុងរបស់ម្ចាស់ផ្ទះ ហ៊្វីលីពីន នៃព្រឹត្តិការណ៍អាស៊ានប៉ារ៉ាហ្គេម ដែលជាការប្រកួតពហុកីឡាជនពិការ ក្រោយព្រឹត្តិការណ៍ស៊ីហ្គេម ១ខែ ដែលបញ្ចប់កាលពីខែធ្នូ ឆ្នាំ២០១៩។ ប៉ុន្តែដោយសារការពន្យាពេលរបស់ម្ចាស់ផ្ទះ ហ៊្វីលីពីន ហើយចូលដល់វិបត្តិជំងឺកូវីដ-១៩នេះបានធ្វើឱ្យព្រឹត្តិការណ៍ថ្នាក់តំបន់មួយនេះត្រូវបានបន្តពន្យាជាច្រើនលើក និងគ្រោងរៀបចំនាខែតុលា ឆ្នាំ២០២០។ ប៉ុន្តែចុងក្រោយនេះត្រូវបានសារព័ត៌មាននានាបានចេញផ្សាយថា ព្រឹត្តិការណ៍នេះត្រូវបានលុបចោលតែម្តង៕

ភ្ជាប់ទំនាក់ទំនងជាមួយ CTS SPORT