ទន្ទឹមនឹងទីផ្សារដោះដូរកៀកចូលមកដល់ របាយការណ៍ចចាមអារ៉ាមចុងក្រោយមួយបានចុះផ្សាយថាតារាឆ្នើម Neymar Jr អាចនឹងក្លាយជាមិត្តរួមក្រុមរបស់ Cristiano Ronaldo នៅឯក្លឹប Juventus ក្នុងលីគ Serie A។
តាមសារព័ត៌មាន Deportes Cuatro បានចុះផ្សាយ សេះបង្កង់នឹងត្រូវលក់កីឡាករជាច្រើនរូបរបស់ខ្លួន ដែលកំពុងគរជើងនៅក្លឹប ហើយប្រមែប្រមូលថវិកានាំយក Neymar មកកាន់ទីក្រុង Turin។ ក្នុងផែនការណ៍នោះ Juventus អាចនឹងលក់ជើងខ្លឹម Paulo Dybala ដើម្បីយកលុយធំ ទាក់យកកីឡាករប្រេស៊ីលចេញពីទឹកដីបារាំង។
បញ្ជាក់ថា Neymar កំពុងឈរលើមន្ទិលសង្ស័យ មិនប្រាកដប្រជាមួយជុំវិញអនាគតរបស់លោក ដែលល្ហិចល្ហៀងមានចិត្តចង់ចាកចេញពី PSG ក្រោយមានភាពរកាំរកូសរឿងផ្ទៃក្នុង និងការដែលខកខានមិនបានឈ្នះពាន UCL នាពេលកន្លងមក៕ ប្រភព៖ BeSoccer
