Gareth Bale មួយរយៈចុងក្រោយនេះ បានទទួលការរិះគន់និងមតិប្រតិកម្មជាខ្លាំងពីសំណាក់អ្នកគាំទ្រ ដែលថារូបគេហាក់គ្មានផលចំណេញអ្វីទាល់តែសោះសម្រាប់ក្លឹប Real Madrid ពោលគ្រាន់តែមកចាំស៊ីថ្លៃពលកម្មទទេៗតែប៉ុណ្ណោះ។
តាមការយល់ឃើញរបស់ Dani Ceballos ដែលបច្ចុប្បន្នកំពុងបាក់ចិត្តត្រៀមផ្ទេរទៅ Arsenal ពេញថ្លៃ នៅតែនិយាយពីភាពវិជ្ជមានរបស់អតីតមិត្តរួមក្រុមខ្លួន ដោយថាមុនមើលស្រាលឬមិនមានជំនឿជាក់លើ Bale អ្នកគួរទៅទស្សនាវីដេអូប្រកួត UEFA Champions League វគ្គផ្តាច់ព្រ័ត្រមួយជាគំរូសិនទៅ។
Ceballos និយាយប្រាប់ Deportes Cuatro ថា៖ “នៅ Premier League ក៏ជាលីគដែលសក្តិសមសម្រាប់គាត់ដែរ តែពេលនេះគាត់មានសារៈសំខាន់ចាំបាច់ហើយសម្រាប់ក្លឹប Real Madrid ដោយអ្នកកុំភ្លេចនូវអ្វីដែលគាត់បានផ្តល់ឲ្យក្លឹប ហើយបើនរណាមិនទុកចិត្តអាចទៅមើលការប្រកួត CL វគ្គផ្តាច់ព្រ័ត្រម្តងទៀតបាន”។
បញ្ជាក់ថានៅឆ្នាំ ២០១៨ គ្រាដែល Real Madrid យកឈ្នះហង្សនៅវគ្គផ្តាច់ព្រ័ត្រ កីឡាករវែលបានក្លាយជាចំណែកដ៏សំខាន់ ដោយរកបាន ២ គ្រាប់ម្នាក់ឯងកាលនោះ ហើយឈ្នះ MOTM ទៀតផង៕
ប្រភព៖ Marca