ឯកឧត្តម វ៉ាត់ ចំរើនរដ្ឋលេខាធិការ ក្រសួងទេសចរណ៍ និងជាអគ្គលេខាធិការគណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍ លើកទី៣២ឆ្នាំ២០២៣ (CAMSOC)បានដឹកនាំកិច្ចប្រជុំជាមួយបណ្តាសហព័ន្ធកីឡាជាតិនានា ដើម្បីបញ្ជូនកីឡាករ កីឡាការិនីជម្រើសជាតិកម្ពុជាទៅហ្វឹកហាត់នៅសាធារណរដ្ឋប្រជាមានិតចិនដែលនឹងចាប់ផ្តើមនៅចុងឆ្នាំ២០២០ ឬនៅដើមឆ្នាំ២០២១ដើម្បីត្រៀមចូលរួមការប្រកួតកីឡាស៊ីហ្គេមលើកទី៣១ ឆ្នាំ២០២១ នៅប្រទេសវៀតណាមនិងស៊ីហ្គេមលើកទី៣២ ឆ្នាំ២០២៣ ដែលកម្ពុជាទទួលធ្វើជាម្ចាស់ផ្ទះ។
សហព័ន្ធកីឡាជាតិ ដែលចូលរួមប្រជុំស្តីពីផែនការបញ្ជូនកីឡាករ កីឡាការិនីជម្រើសជាតិចេញទៅហ្វឹកហាត់នៅប្រទេសចិននេះត្រូវបានប្រារព្ធធ្វើឡើង កាលពីថ្ងៃទី០៧ ខែឧសភា ឆ្នាំ២០២០ នៅទីស្នាក់ការគណៈកម្មាធិការជាតិកម្ពុជា ដោយមានសមាសភាពអគ្គលេខាធិការនៃសហព័ន្ធកីឡាជាតិនានា ដូចជាសហព័ន្ធកីឡាបាល់ទាត់កម្ពុជា, កាយសម្ព័ន្ធ ហែលទឹក ចំបាប់ វាយសី វាយកូនឃ្លីលើតុ បាល់បោះ បាល់ទះ និងតំណាងសហព័ន្ធមួយចំនួនទៀត។
ឆ្លងកាត់កិច្ចប្រជុំអនឡាញជាមួយភាគីចិនថ្មីនេះ គឺយើងអាចបញ្ជូនអត្តពលិកជម្រើសជាតិទៅហ្វឹកហាត់នៅនាខែវិច្ឆិកា ឆ្នាំ២០២០ ឬក្នុងខែកុម្ភៈ ឬខែមីនា ឆ្នាំ២០២០ ដោយឯកឧត្តមប្រាប់ឱ្យសហព័ន្ធកីឡាជាតិនានាត្រៀមកីឡាករ កីឡាការិនីឱ្យហើយ។ ការហ្វឹកហាត់នៅប្រទេសចិននេះនឹងត្រូវបន្តរហូតដល់ពេលចូលរួមប្រកួតស៊ីហ្គេម នាខែចុងខែវិច្ឆិការហូតដល់ដើមខែធ្នូ ឆ្នាំ២០២១ នៅវៀតណាម នៅក្រោយចប់ស៊ីហ្គេម នៅវៀតណាម ត្រូវចេញទៅបន្តហ្វឹកហាត់ទៀត រហូតដល់ស៊ីហ្គេម លើកទី៣២ នាឆ្នាំ២០២៣ នៅកម្ពុជាតែម្តង។
លោក ណយ ផាណា អគ្គលេខាធិការ សហព័ន្ធកីឡាកាយសម្ព័ន្ធកម្ពុជាបានប្រាប់ទីភ្នាក់ងារសារព័ត៌មានកម្ពុជា AKP ឱ្យដឹងថា តាមផែនការសហព័ន្ធបានត្រៀមកីឡាករ កីឡាការិនីជម្រើសជាតិរបស់ខ្លួនចំនួន១០នាក់ ក្នុងការបញ្ជូនទៅហ្វឹកហាត់នៅប្រទេសចិន នាចុងឆ្នាំ២០២០ ឬដើមឆ្នាំ២០២០។ លោកបានលើកឡើងថា “តាមពិត ប្រសិនបើគ្មានវិបត្តិជំងឺកូវីដ-១៩ នេះទេ ក្រុមជម្រើសជាតិទាំងអស់ជាង១០០នាក់នឹងត្រូវបានបញ្ជូនទៅហ្វឹកហាត់នៅក្នុងអំឡុងខែឧសភានេះហើយ ប៉ុន្តែដោយសារស្ថានភាពនេះការបញ្ជូននេះត្រូវបានពន្យាពេល ហើយតាមគម្រោងថ្មី គឺនឹងបញ្ជូននាចុងឆ្នាំ២០២០ ឬនៅដើមឆ្នាំ២០២០”។
អគ្គលេខាធិការរូបនេះបានបន្ថែមថា ការហ្វឹកហាត់នៅសាធារណរដ្ឋប្រជាមានិតចិនេះនឹងផ្តល់ប្រយោជន៍យ៉ាងច្រើន ក្នុងការបង្កើនប្រសិទ្ធផលរបស់កីឡាករ កីឡាការិនីកាយសម្ព័ន្ធដើម្បីត្រៀមស៊ីហ្គេម លើកទី៣១ នៅប្រទេស វៀតណាម ឆ្នាំ២០២១ និងស៊ីហ្គេម លើកទី៣២ ឆ្នាំ២០២៣ នៅកម្ពុជា កាន់តែល្អប្រសើរ ពីព្រោះថា ប្រភេទកីឡាកាយសម្ព័ន្ធរបស់ប្រទេសមានភាពរីកចម្រើនខ្លាំង និងកំពុងស្ថិតនៅក្នុងកម្រិតខ្ពស់ ក្នុងចំណោមបណ្តាប្រទេសខ្លាំងៗ លើពិភពលោក៕
