នាយកជាន់ខ្ពស់ប្រចាំក្លឹប Ajax គឺអ្នកចាំទីជើងចាស់លោក Van der Sar បានបង្ហើបតម្រុយចំៗថា រ៉ាដាកំពូលមួយរូបដែលក្លឹបជាច្រើនចង់បាន កីឡាករ Donny van de Beek អាចដើរចេញពីក្លឹបនាទីផ្សារដោះដូរពេលខាងមុខ តែលុះត្រាមានសំណើនូវតម្លៃសមស្របមួយ។
Van de Beek កំពុងមានក្លឹបជាច្រើនចង់បាន តាំងពី Tottenham, Manchester United, Barcelona និង Real Madrid ជាដើម ក្រោយមើលឃើញពីសមត្ថភាពដ៏ប៉ិនប្រសព្វរបស់កីឡាករហូឡង់ចាប់តាំងពីការឡើងជើងនៅ UCL នាឆ្នាំ ២០១៩។
លោក Van der Sar និយាយ៖ “ឆ្នាំទៅយើងបាននិយាយត្រូវរ៉ូវជាមួយ Onana, Tagliafico និង Van de Beek ឲ្យបន្តឈរជើងរដូវកាលក្រោយទៀត ប៉ុន្តែយើងក៏បានគិតគូរដល់អនាគតនៃជំហានបន្ទាប់ក្នុងអាជីពពួកគេ តែចំពោះតម្លៃខ្លួនគ្មានការចុះថោកជាងមុន ៥០ ភាគរយអ្វីឡើយ”។
ជាសារដែលច្រានចោលការលើកឡើងរបស់ភាគីខាង Bayern Munich ធ្លាប់និយាយ លោក Van der Sar បន្ថែម៖ “ក្លឹបធំៗដូចជា Bayern Munich បាននិយាយថាតម្លៃខ្លួនកីឡាករនឹងមានការធ្លាក់ចុះនៅទីផ្សារដោះដូរពេលខាងមុខ [ដោយសារវិបត្តិ COVID-19] តែការនិយាយបែបនេះវាងាយសម្រាប់ពួកគេដែលជាអ្នកចាយលុយទិញ តែសម្រាប់កីឡាករដែលចេញពី Ajax គឺខ្ញុំគិតថានៅតែមានតម្លៃថ្លៃដដែល”៕ ប្រភព៖ AF