Dybala ​ចង់​ឃើញ Pogba ​ត្រលប់​មក​លេង​នៅ Juventus ​វិញ​

Paulo Dybala ​បាន​បង្ហើប​ថា​ចង់​បាន​ខ្សែ​បម្រើ Paul Pogba ​មក​លេង​នៅ​ក្រុម Juventus ​វិញ ​ព្រោះ​ថា​កន្លង​មក​ពួកគេ​មាន​រដូវ​កាល​ល្អ​ៗ​ជាមួយ​គ្នា​យ៉ាង​ច្រើន។

​កីឡាករ​ទាំង​ពីរ​ខាង​លើ​នេះ ​ធ្លាប់​លេង​ជាមួយ​គ្នា​១​រដូវ​កាល ២០១៥-១៦ ​ដោយ​បាន​ឈ្នះ​ពាន​រង្វាន់​២​គឺ Serie A ​និង Coppa Italia ​មុន​ពេល Pogba ​ចាកចេញ​ទៅ​ចូល​រួម​ជាមួយ Man Utd ​នៅ​ឆ្នាំ ២០១៦។  ដោយឡែក​លេង​ជាមួយ​គ្នា​តែ​១​រដូវ​កាល​មែន ប៉ុន្តែ​ខ្សែ​ប្រយុទ្ធ​អាហ្សង់ទីន បាន​ចាត់​ទុក​កីឡាករ​បារាំង​ជា​មិត្ត​រួម​ក្រុម​ល្អ​ម្នាក់។ ដោយ​រូបគេ​រំពឹង​ថា Pogba ​នឹង​ត្រលប់​មក​លេង​ជាមួយ​ក្រុម Juventus ​វិញ ​នៅ​ពេល​ខាង​មុខ​ផង​ដែរ។

​Dybala ​បាន​និយាយ​ថា​៖ “ខ្ញុំ​បាន​ប្រមូល​អាវ​របស់​កីឡាករ​ល្បី​ៗ ​ដោយ​ក្នុង​នោះ​ក៏​មាន Pogba ​ម្នាក់​ដែរ ពេល​យើង​លេង​ទល់ Man Utd ​នៅ​ឆ្នាំ ២០១៨​កន្លង​ទៅ។ ​ខ្ញុំ​បាន​ចាត់​ទុក​គាត់​ជា​មនុស្ស​ល្អ ​មិន​ត្រឹម​តែ​ជា​កីឡាករ​ម្នាក់​នោះ​ទេ។ ខ្ញុំ​មាន​ពេល​វេលា​ដ៏​ល្អ​ជាមួយ​គាត់​១​រដូវ​កាល ​ហើយ​ខ្ញុំ​សង្ឃឹម​ថា​យើង​នឹង​អាច​មាន​ពេល​ល្អ​ជាមួយ​គ្នា​ទៀត​នៅ​ពេល​ខាង​មុខ”៕ប្រភព Dailymail

ភ្ជាប់ទំនាក់ទំនងជាមួយ CTS SPORT