ខ្សែប្រយុទ្ធ Luka Jovic បានរងរបួសបាក់ឆ្អឹងជើងខាងស្ដាំរបស់ខ្លួន ក្រោយពីក្រុមគ្រូពេទ្យ Real Madrid បានពិនិត្យរូបគេកាលពីម្សិលមិញនេះ។
ក្រុម Real Madrid មិនបានបញ្ជាក់ច្បាស់ថាការរបួសរហូតដល់បាក់ឆ្អឹងជើងនេះ បណ្ដាលមកពីអ្វីនោះទេ។ ដោយបានដឹងត្រឹមថារបួសនេះអាចនឹងធ្វើឱ្យរូបគេអវត្តមានជាច្រើនសប្ដាហ៍ទៅមុខទៀត មិនអាចចូលហាត់ជាមួយក្រុមបានឡើយ។ ដូច្នេះរដូវកាលនេះ បើទោះជាលីគត្រលប់មកវិញ ក៏ខ្សែប្រយុទ្ធសែបនេះ អាចមិនបានចូលលេងដែរ។
រំលឹកថាក្រុម Real Madrid បានកោះហៅកីឡាករទាំងអស់របស់ខ្លួនឱ្យត្រលប់មកអេស្ប៉ាញវិញ ដើម្បីធ្វើតេស្ដត្រៀមហ្វឹកហាត់។ ដោយមានដំណឹងមកថា ក្របខណ្ឌ La Liga អាចនឹងត្រលប់មកវិញនៅថ្ងៃទី២០ខែក្រោយនេះហើយ៕ប្រភព Marca
