បើនិយាយពីឈ្មោះ Jesse Lingard ប្រសិនអ្នកជាអ្នកគាំទ្រដាំខ្ទឹមម្នាក់របស់ Man Utd នោះប្រាកដជាមិនសូវពេញចិត្តកីឡាករបម្រើប្រយុទ្ធរូបនេះទេ ពោលពិតជាចង់ឲ្យក្លឹបលក់រូបគេចេញឲ្យបានឆាប់កាន់តែល្អ។
នោះក៏ដោយសារកង្វះសមត្ថភាពនិងការខាតបង់ថ្លៃពលកម្មដែលក្លឹបត្រូវផ្តល់ឲ្យ ក្រោយ Lingard មិនអាចដើរតួជាអ្នកចូលរួមចំណែករកគ្រាប់បាល់យ៉ាងសកម្មមួយទាល់តែសោះឲ្យក្លឹប។ ជិតមួយរដូវកាល ២០១៩/២០ កីឡាករអង់គ្លេសទើបរកបាន ២ គ្រាប់គត់ នៅ ៣៥ ប្រកួតសរុប។
តាមរបាយការណ៍ពី TheSun បានចុះផ្សាយ ក្លឹប Man Utd ហាក់មានចិត្តចង់ជ្រេរូបគេចេញពី Old Trafford ហើយ ដោយកំពុងមានក្លឹប ៤ សម្លឹងឃើញ ដូចជា Newcastle United, Leicester City, Everton និង West Ham ដែលសុទ្ធសឹងជាក្រុមរួមលីគ PL។
សម្រាប់តម្លៃគឺ United ចង់ទាមទារយកប្រមាណ ៣០ លានផោន ពីសំណាក់ក្លឹបដែលចង់បានកីឡាករវ័យ ២៧ ឆ្នាំ ដើម្បីប្រមែប្រមូលថវិកាទៅចរចាយក Jadon Sancho ចេញពី Dortmund វិញ៕
ប្រភព៖ TheSun