ក្លិប​ការពារ​ដំណែង​ជើងឯក​ស្វាយរៀង​ចូលហ្វឹកហាត់តិចៗឡើងវិញ ក្រោយ​ Covid -19 ធូរស្រាល

ក្រុមការពារដំណែងម្ចាស់ដំណែងជើងឯករដូវកាល ២០១៩ ព្រះខ័នរាជស្វាយរៀងបាន​ចាប់​ផ្តើម​ហ្វឹកហាត់វិញ ហើយក្នុងទ្រង់ទ្រាយតូចៗ បើទោះបីជាការប្រកួតលីគកំពូលមិន​ទាន់​ប្រកាសឱ្យដំណើរការឡើងវិញយ៉ាងណាក្តី។

បើតាមការអះអាងរបស់ក្លឹបព្រះខ័នរាជស្វាយរៀង​បានឱ្យដឹងថា ពេលនេះកីឡាករបាន​ចាប់ផ្តើមហ្វឹកហាត់ជាបណ្តើរៗឡើងវិញហើយ ដោយត្រៀមខ្លួនរួចជាស្រេច ដើម្បីបន្តការប្រ​កួត​ប្រជែង ក្នុងក្របខ័ណ្ឌលីគកម្ពុជាឱ្យបានកាន់តែខ្លាំងក្លា ប៉ុន្តែការហ្វឹកហាត់នេះរក្សាឱ្យ​បាន​សុវត្ថិភាព ដែលការហ្វឹកហាត់ នេះត្រូវបានចែកចេញជាក្រុមតូចៗ តាមគោលការណ៍ណែនាំ​របស់រដ្ឋាភិបាល ដើម្បីធានាឱ្យបាននូវស្ថានភាពល្អប្រសើរ។ ការប្រកួលីគកំពូលកម្ពុជាត្រូវ​បាន​ផ្អាកការប្រកួត តាំងពីខែមីនា ត្រឹមសប្តាហ៍ទី៥ ដោយសារវិបត្តិនៃការរីករាលដាល​ជំងឺ​កូវីដ-១៩។ ៥ប្រកួតរបស់ក្រុមការពារដំណែងជើងឯកនេះឈ្នះ៤ប្រកួត និងស្មើ១ប្រកួត មាន​១៣ពិន្ទុ ឈរនៅលេខ២បណ្តោះអាសន្ន។

ដោយសារវិបត្តិជំងឺកូវីដ១៩នេះបានធ្វើឱ្យការប្រមូលផ្តុំ និងការប្រកួតនានា​ត្រូវបានផ្អាក ដោយកីឡាករបាល់ទាត់នៃបណ្តាក្លឹបនានាបន្តការហ្វឹកហាត់នៅតាម​ផ្ទះរៀងៗ​ខ្លួន ក្រោមការត្រួតពិនិត្យការហ្វឹកហាត់ពីគ្រូបង្គោលនៃក្លឹបនីមួយៗ។ ចំពោះក្លឹបបាល់​ទាត់​មួយចំនួនទៀត ក៏នៅតែបន្តការហ្វឹកហាត់ជាក្រុមតូចៗដែរ ដោយរក្សានូវគម្លាត ការវាស់កម្តៅ ការប្រើប្រាស់អាល់កុលលាងសម្អាតដៃ ដើម្បីបង្ការជំងឺផ្លូវដង្ហើមនេះ តាមការណែនាំរបស់​ក្រសួង​សុខាភិបាល។

សម្រាប់ក្លឹបខ្លះៗទៀត នៃក្របខ័ណ្ឌលីគកំពូលកម្ពុជាក៏បានប្រកាសថា​នឹងអាចប្រមូលផ្តុំហ្វឹកហាត់ឡើងវិញ នាដើមខែឧសភា ឆ្នាំ២០២០នេះ។ គិតដល់ត្រឹម​ថ្ងៃទី៣០ ខែមេសា ឆ្នាំ២០២០នេះ សហព័ន្ធកីឡាបាល់ទាត់កម្ពុជានៅមិនទាន់មានប្រកាស​ថាតើការ​ប្រកួតលីគកំពូលកម្ពុជា និងពានរង្វាន់សម្តេចតេជោ ហ៊ុន សែន រដូវកាល ២០២០នឹង ត្រូវវិល​ត្រឡប់មកវិញ ពេលណានោះដែរ ដោយមន្ត្រីសហព័ន្ធកីឡាបាល់ទាត់កម្ពុជាក៏កំពុងរង់ចាំ​មើល​ការណែនាំជាថ្មី ពីរាជរដ្ឋាភិបាលកម្ពុជា និងក្រសួងសុខាភិបាលដូចគ្នាផងដែរ៕

ភ្ជាប់ទំនាក់ទំនងជាមួយ CTS SPORT