Didier Deschamps ជាគ្រូបង្វឹកដែលដឹកនាំក្រុមបាល់ទាត់ជម្រើសជាតិបារាំង លើកពាន World Cup 2018 នៅប្រទេសរុស្ស៊ី បន្ទាប់ពីយកឈ្នះលើក្រុមក្រូអាត ៤-២ នៅយប់មិញនេះ។
ជ័យជម្នះជួយក្រុមលើកពាននេះ បានធ្វើឱ្យលោក Deschamps ក្លាយជាមនុស្សទី៣ហើយ ដែលបានលើកពាន World Cup តាំងពីនៅលេងជាកីឡាករបាល់ទាត់ រហូតដល់ដឹកនាំប្រទេសលើកពាននេះទៀត។ មនុស្ស២នាក់ផ្សេងទៀត ដែលធ្វើបានដែរនោះ គឺ Mario Zagallo ជនជាតិប្រេស៊ីល លើកពាន World Cup បាន២ដងជាកីឡាករ និងដឹកនាំក្រុមជម្រើសជាតិប្រេស៊ីលលើកពានម្ដង ទៀតជាគ្រូបង្វឹក និង Franz Beckenbauer ជនជាតិអាល្លឺម៉ង់ ក៏សុទ្ធតែធ្វើដូច្នេះបានដូចគ្នា។
សម្រាប់លោក Deschamps បានលើកពានWorld Cup នៅឆ្នាំ ១៩៩៨ ដោយគ្រានោះ លោកជាប្រធានក្រុមជម្រើសជាតិបារាំងតែម្ដង។ ឆ្លងកាត់២០ឆ្នាំកន្លងទៅ បុរសវ័យ៤៩ឆ្នាំរូបនេះ បានដឹកនាំក្រុមជម្រើសជាតិបារាំងឱ្យលើកពាន World Cup នេះម្ដងទៀតលើទឹកដីរុស្ស៊ី៕ប្រភព៖ DailyMail