លោក Michel d’Hooghe ជាប្រធានផ្នែកពេទ្យរបស់ FIFA បានបញ្ជាក់ថាបាល់ទាត់មិនគួរចាប់ផ្ដើមវិញនៅពេលនេះទេ ព្រោះការចម្លងមេរោគ Covid-19 នៅមានកម្រិតខ្ពស់នៅឡើយ។
លោក Michel បានមើលឃើញថាទ្វីបអឺរ៉ុប បើទោះជាបច្ចុប្បន្នបានធូរបន្តិចក្ដី ប៉ុន្តែមិនទាន់អាចគ្រប់គ្រងមេរោគ Covid-19 នៅឡើយទេ។ ពួកគេត្រូវការពេលយូរទៀត និងហាមដាច់ខាតចំពោះការប្រមូលផ្ដុំគ្នានៅព្រឹត្តិការណ៍មនុស្សច្រើន បើមិនដូច្នេះទេការចម្លងទ្រង់ទ្រាយធំនឹងកើតមានឡើងវិញមិនខាន។
ប្រធានផ្នែកពេទ្យរបស់ FIFA ខាងលើបាននិយាយថា៖ “បើនិយាយក្នុងនាមជាពេទ្យ ដែលគិតពីការស្លាប់និងរស់នោះ បាល់ទាត់កុំទាន់ចាប់ផ្ដើមប្រកួតវិញអី។ ក្លឹបទាំងអស់គួរតែរៀបចំសម្រាប់រដូវកាលថ្មីខាងមុខវិញទៅល្អជាង។ វាមានការចាំបាច់ណាស់ ក្នុងការត្រៀមខ្លួនសម្រាប់របៀបថ្មីនៃការលេងបាល់ទាត់អំឡុងពេលមេរោគ Covid-19 នេះ”៕ប្រភព Marca