លោក Wagner Ribeiro ដែលជាភ្នាក់ងារម្នាក់របស់ Neymar បានបង្ហើបថាតាំងពីរដូវកាលមុនមកដល់ពេលនេះ ក្រុម Real Madrid តែងតែមានក្ដីស្រមៃចង់បានកីឡាករប្រេស៊ីលរូបនេះខ្លាំងណាស់។
អធិរាជស ត្រូវបានគេដឹងថាទាក់ទងចង់ទិញ Neymar ពីក្រុម PSG តាំងពីឆ្នាំមុនម្ល៉េះ ប៉ុន្តែមិនអាចសម្រេចទៅបានព្រោះក្រុម PSG ដាក់តម្លៃខ្លួនខ្ពស់ខ្លាំងពេក។ លោក Wagner ដែលជាភ្នាក់ងារម្នាក់របស់អតីតកីឡាករ FC Barcelona បាននិយាយថាក្រុមរបស់លោក Zidane មិនដែលបោះបង់ចោលក្ដីស្រមៃដើម្បីនាំយកខ្សែប្រយុទ្ធខាងលើទៅរួមក្រុមនោះទេ។
លោក Wagner Ribeiro បាននិយាយបែបនេះថា៖ “ខ្ញុំបានទៅក្រុងម៉ាឌ្រីតជាច្រើនលើក ព្រោះតែលោក Florentino គាត់មានក្ដីស្រមៃយក Neymar ឱ្យបាន។ ពួកគេចង់បាន Neymar តាំងពីរដូវកាលមុន ប៉ុន្តែដោយសារតែក្រុម PSG ដាក់តម្លៃខ្លួនលក់ចេញដល់៥០០លានអឺរ៉ូ ទើបបានជាក្រុម Real Madrid ដកថយវិញទៅ”៕ប្រភព Marca
