ជា​រឿង​ឈឺចាប់​បំផុត ប្រសិន​កីឡាករ​ត្រូវ​រង​បរាជ័យ​នៅ​វគ្គ​ផ្ដាច់ព្រ័ត្រ​ពាន​រង្វាន់​ធំ​ណា​មួយ ព្រោះ​ពួក​គេ​បាន​ខិតខំ​ឆ្លង​កាត់​តាំង​ពី​វគ្គ​ដំបូង មក​ដល់​វគ្គ​ចុងក្រោយ។

ប៉ុន្តែ​វា​កាន់​តែ​នឹង​ឈឺចាប់​ថែម​ទៀត ប្រសិន​កីឡាករ​រូប​នោះ​បាន​រង​បរាជ័យ​នា​វគ្គ​ផ្តាច់ព្រ័ត្រ​នៃ​ពាន​ដល់​ទៅ ២ ក្នុង​ឆ្នាំ​តែ​មួយ។ ខាង​ក្រោម​យើង​បង្ហាញ​ ៤ រូប​ដែល​ជា​កីឡាករ​ស៊យ​ធំ​បំផុត៖

1.Thiery Henry ចាញ់​វគ្គ​ផ្តាច់ព្រ័ត្រ World Cup និង UEFA Champions League ឆ្នាំ ២០០៦

នៅ​ព្រឹត្តិការណ៍ FIFA World Cup ឆ្នាំ ២០០៦ ដែល​ប្រទេស​អាល្លឺម៉ង់​ធ្វើ​ជា​ម្ចាស់ផ្ទះ ​កាល​នោះ​គឺ​ក្រុម​ជម្រើស​ជាតិ​អ៊ីតាលី​បាន​យក​ឈ្នះ​លើ​ក្រុម​មាន់​គក​បារាំង ដោយ​បាល់​ប៉េណាល់ទី​ថែម​ម៉ោង​នៅ​លទ្ធផល ៥-៣។

កាល​នោះ Thiery Henry បាន​លេង​នៅ​តំណែង​ខ្សែ​ប្រយុទ្ធ​កណ្តាល ដោយ​ឈរ​ជើង​លើ​ទីលាន​បាន ១០៧ នាទី​មុន​ត្រូវ​បាន​ប្តូរ​ចេញ ប៉ុន្តែ​លោក​មិន​មាន​ឱកាស​រក​បាន​គ្រាប់​បាល់​ដើម្បី​ជួយ​ឲ្យ​បារាំង​ឈ្នះ​ពាន World Cup នោះ​ទេ។

ចំណែក​ឯ​ការ​លេង​ឲ្យ​ក្លឹប Henry ក៏​រង​បរាជ័យ​នៅ UCL នា​ឆ្នាំ​តែ​មួយ​ថែម​ទៀត អំឡុង​ពេល​ដែល​ Barcelona បាន​យក​ឈ្នះ​ទៅ​លើ Arsenal នៅ​លទ្ធផល ២-១ ​នៅ​ឯ​កីឡដ្ឋាន​ក្នុង​ប្រទេស​បារាំង។

2.Michael Ballack ​ចាញ់​វគ្គ​ផ្តាច់ព្រ័ត្រ Euro និង UEFA Champions League ឆ្នាំ ២០០៨

នៅ​ឆ្នាំ​ ២០០៨ Michael Ballack បាន​លេង​នៅ​តំណែង​ខ្សែ​បម្រើ​ប្រយុទ្ធ​ឲ្យ​ក្រុម​ជម្រើស​ជាតិ​អាល្លឺម៉ង់ នៅ​ជំនួប​ប៉ះ​គ្នា​ជាមួយ​អេស្ប៉ាញ​នា​វគ្គ​ផ្តាច់ព្រ័ត្រ Euro ឆ្នាំ ២០០៨។ គ្រា​នោះ​គឺ​អេស្ប៉ាញ​យក​ឈ្នះ​លើ​អាល្លឺម៉ង់​នៅ​លទ្ធផល ១-០។

ខ្សែ​បម្រើ​លេង​ឲ្យ​ក្លឹប​តោ​ខៀវ Chelsea រូប​នេះ ក៏​របូត​ឱកាស​ឈ្នះ​ ពាន UCL នា​ឆ្នាំ​តែ​មួយ ក្រោយ Man Utd យក​ឈ្នះ​នៅ​វគ្គ​កាត់សេចក្តី​បាល់​ប៉េណាល់​ទី​នៅ​លទ្ធផល ៦-៥ នៅ​ឯ​កីឡដ្ឋាន​ក្នុង​ទីក្រុង​ម៉ូស្កូ ប្រទេស​រុស្ស៊ី។

3.Arjen Robben ចាញ់​វគ្គ​ផ្តាច់ព្រ័ត្រ World Cup និង UEFA Champions League ឆ្នាំ ២០១០

នៅ​ឆ្នាំ ២០១០ អេស្ប៉ាញ​បាន​យក​ឈ្នះ​ទៅ​លើ​ហូឡង់​ដោយ​លទ្ធផល ០-១ ក្រោយ​ថែម​ម៉ោង ១៥ នាទី​ពីរ​ដង ​នៅ​ឯ​កីឡដ្ឋាន​ក្នុង​ប្រទេស​អាហ្វ្រិក​ខាង​ត្បូង​សម្រាប់​ព្រឹត្តិការណ៍ FIFA World Cup។ រី​ឯ​ការ​ប្រកួត UEFA Champions League ​គឺ Bayern Munich បាន​រង​បរាជ័យ​ក្រោម​ថ្វី​ជើង Inter Milan ដោយ​លទ្ធផល ០-២ ក្នុង​ទីក្រុង Madrid ប្រទេស​អេស្ប៉ាញ។

ក្នុង​ចំណោម​កីឡាករ​នៃ​ប្រកួត​ទាំង​នោះ​គឺ Arjen Robben ជា​កីឡាករ​មួយ​រូប ដែល​មិន​មាន​សំណាង​និង​ត្រូវ​របូត​ពាន​ធំ​ផ្ទួន​គ្នា​ក្នុង​ឆ្នាំ​តែ​មួយ។

4.Antoine Griezmann ចាញ់​វគ្គ​ផ្តាច់ព្រ័ត្រ Euro និង UEFA Champions League ឆ្នាំ ២០១៦

អ្នក​គាំទ្រ​វិស័យ​បាល់ទាត់​ជា​ច្រើន​ប្រាកដ​ជា​នៅ​ចាំ នូវ​ជ័យជម្នះ​ UEFA Euro លើក​ទី ១ របស់​ក្រុម​ជម្រើស​ជាតិ​ព័រទុយហ្គាល់​កាល​ពី​ឆ្នាំ​ ២០១៦ តែ​ពេល​នោះ​ក៏​ឆ្នាំ​ដែល Antoine Griezmann ទទួល​ភាព​ឈឺចាប់​ខ្លាំង​បំផុត​ដែរ។

នៅ Euro ក្រុម​ជម្រើស​ជាតិ​បារាំង​របស់​ខ្លួន បាន​រង​បរាជ័យ​នៅ​លទ្ធផល ១-០ រី​ឯ​នៅ UEFA Champions League ក្នុង​ឆ្នាំ​ដដែល ក្លឹប Real Madrid បាន​បំបាក់​ក្លឹប Atletio Madrid នៅ​វគ្គ​កាត់សេចក្តី​បាល់​ប៉េណាល់ទី ៥-៣ ថែម​ទៀត៕

ប្រភព៖ FootballArena