ប្រសិន ៩២ ប្រកួត​សរុប ដែល​សេសសល់​នា​រដូវ​កាល ២០១៩/២០ ​មិន​អាច​បញ្ចប់​ទៅ​បាន​ទេ​នោះ UEFA ទំនង​ជា​នឹង​ប្រើប្រាស់​មធ្យោបាយ​នៃ​ការ​សម្រេច​យក​ក្រុម​លេង​ពាន​រង្វាន់​អឺរ៉ុប​រដូវ​កាល​ក្រោយ ផ្អែក​តាម​កម្រិត​ពិន្ទុ​នៃ Coefficient Score វិញ។ នេះ​បើ​តាម​សារព័ត៌មាន The Sun បាន​ចុះ​ផ្សាយ។

ពិន្ទុ Coefficient គឺ​ជា​ពិន្ទុ​ដែល​គណនា​ដោយ UEFA សម្រាប់​ការ​ប្រកួត​នា​រយៈ​ពេល ១០ ឆ្នាំ​ចុង​ក្រោយ មិន​ថា​តែ​កម្រិត​លេង​របស់​ក្រុម​នីមួយៗ​ក្នុង​និង​ក្រៅ​ក្របខ័ណ្ឌ។

បច្ចុប្បន្ន​បើ​រាប់​តែ​នៅ Premier League ដែល​មាន​កម្រិត​ពិន្ទុ​ខ្ពស់​បំផុត​លំដាប់​ទាំង ៤ មាន​ដូច​ជា Man City (112 000 ពិន្ទុ) Liverpool (99 000 ពិន្ទុ) Man Utd (92 000 ពិន្ទុ) និង Arsenal (91 000 ពិន្ទុ)។ បែប​នេះ​ប្រសិន UEFA ជ្រើសរើស​យក​ ៤ កៅអី​សម្រាប់​ក្រុម​នៅ PL ផ្អែក​តាម Coefficient Score គឺ​ក្រុម​ទាំង ៤ ខាង​លើ​នេះ​ហើយ។

ក្រុម​បន្ទាប់​មាន​ដូច​ជា Tottenham (85 000 ពិន្ទុ) Chelsea (83 000 ពិន្ទុ) Leicester City (22 000 ពិន្ទុ) ដែល​ក្រុម​ទាំង​នេះ​អាច​នឹង​ត្រូវ​បាន​ផ្ទេរ​កៅអី​ទៅ​លេង​នៅ UEFA Europa League។

ប៉ុន្តែ​ក្នុង​លក្ខខណ្ឌ​ពិសេស​មួយ ប្រសិន​ណា​ការ​សម្រេច​មិន​ឲ្យ City លេង UCL រយៈ​ពេល ២ ឆ្នាំ​ត្រូវ​បាន​អនុម័ត នោះ Spurs នឹង​ចំណេញ​កៅអី​ស្វ័យប្រវត្តិ​តែ​ម្តង៕ ប្រភព៖ AF