កីឡាកររបស់ក្លឹប Real Madrid គឺ Achraf Hakimi ដែលបច្ចុប្បន្នកំពុងលេងខ្ចីជើងឲ្យក្លឹប Dortmund ត្រូវបានសរសើរថាជាខ្សែការពារស្លាបស្តាំល្អដាច់គេក្នុងលោកនាពេលបច្ចុប្បន្ន ស្មើនឹងកម្រិតលេងជាមួយ Trent Alexander-Arnold របស់ Liverpool។ នេះបើតាមភ្នាក់ងាររបស់ Hakimi ផ្ទាល់ គឺលោក Alejandro Camano បាននិយាយ។
ប្រាប់សារព័ត៌មាន Sky Germany លោក Camano និយាយ៖ “Hakimi ជាខ្សែការពារស្លាបស្តាំល្អដាច់គេក្នុងលោកជាមួយនឹង Alexander-Arnold ដោយក្រុមទាំងអស់នៅអឺរ៉ុបសុទ្ធសឹងតែចង់បាន Hakimi ក៏រួមទាំង Real Madrid ផងដែរ”។
លោកបន្ថែម៖ “តែ Dortmund នៅតែស្ថិតក្នុងជម្រើសការគិតរបស់យើង យើងកំពុងរង់ចាំចម្លើយនៃរឿងមួយនេះ”។
ឆ្លើយតបទៅនឹងចចាមអារ៉ាមដែលថា Bayern Munich ជាក្លឹបប្រជែង Dortmund នៅ Bundesliga ក៏ចាប់អារម្មណ៍ដែរនោះ ត្រូវបាន Camano ធ្វើការបដិសេធ ដោយថាមិនទាន់មានការទាក់ទងណាមួយចេញពីភាគីខាង Bayern មកខ្លួនឡើយ៕
ប្រភព៖ AF