“ក្រៅ​ពី Real គឺ​ក្លឹប​មួយ​នេះ​ហើយ​សក្តិសម​បំផុត​សម្រាប់ James Rodriguez” – Faustino

ជើង​ចាស់​លោក Faustino Asprilla ដែល​ជា​កីឡាករ​រួម​សញ្ជាតិ​កូឡុំប៊ី បាន​និយាយ​អំពី​អនាគត​មិន​ប្រាកដប្រជា​របស់​កីឡាករ James Rodriguez ដែល​ល្ហិចល្ហៀង​ថា​អាច​នឹង​ដើរ​ចេញ​ពី Real នា​រដូវ​ក្តៅ​ខាង​មុខ។

ខ្សែ​បម្រើ​ប្រយុទ្ធ​របស់ Real Madrid រូប​នេះ បាន​ចាយ​ពេល ២ រដូវ​កាល​នៅ​លក្ខខណ្ឌ​ខ្ចី​ជើង​ជាមួយ Bayern ហើយ​ទើប​តែ​ត្រលប់​មក​ Bernabeu ​នា​រដូវ​កាល ២០១៩/២០ ប៉ុន្តែ​ហាក់​មិន​ស្ថិត​ក្នុង​ក្រសែ​ភ្នែក​ត្រូវការ​របស់​លោក Zidane ទាល់​តែ​សោះ។

ឆ្លើយតប​ពី​លោក Faustino បាន​យល់​ឃើញ​ថា៖ “Man Utd គឺ​ជា​ក្លឹប​ដែល​សក្តិសម​សម្រាប់ James បំផុត ដោយសារ​ណា​មួយ​ក្លឹប​នោះ​ខកខាន​ឈ្នះ​ពាន​ជា​យូរ​ណាស់​មក​ហើយ និង​ពួក​គេ​កំពុង​ចង់​ពង្រឹង​ប្រព័ន្ធ​លេង​រដូវ​កាល​បន្ទាប់​ផង”។

លោក​បន្ថែម​ប្រាប់ Blu Radio៖ “ពួក​គេ​មាន​កីឡាករ​ល្អៗ​ដូច​ជា Juan Mata ដែល​ទម្រង់​លេង​របស់​គេ​ក៏​ស្រដៀង​នឹង James ​ហើយ​ខ្ញុំ​គិត​ថា​ James នឹង​ងាយ​អាច​សម្រប​ខ្លួន​ទៅ​កាន់​ក្រុម​មួយ​នេះ​បាន​រហ័ស​បំផុត”៕

ប្រភព៖ AF

ភ្ជាប់ទំនាក់ទំនងជាមួយ CTS SPORT