ឯកឧត្តម វ៉ាត់ ចំរើន អគ្គលេខាធិការ គណៈកម្មាធិការជាតិអូឡាំពិកកម្ពុជាបានថ្លែងថា ក្នុងពេល សម្រាកសកម្ម ក្នុងពេលវិបត្តិកូវីដ-១៩នេះ ដោយឯកឧត្តមបានអំពាវនាវឱ្យសហព័ន្ធកីឡាជាតិទាំងអស់រៀបចំផែនការហ្វឹកហាត់របស់កីឡាករ កីឡាការិនីជម្រើសជាតិឱ្យបន្តការហ្វឹកហាត់នៅតាមផ្ទះ ឬការប្រមូលផ្តុំទ្រង់ទ្រាយតូច ដែលមានគ្នាពី២ទៅ៣នាក់ ដែលមានសុវត្ថិភាព គប្បីត្រូវលើកទឹកចិត្តពួកគាត់ឱ្យហ្វឹកហាត់រយៈពេល ៣ម៉ោង ក្នុង១ថ្ងៃៗ។
ឯកឧត្តមបានបញ្ជាក់ថា កីឡាជំនាញកម្រិតខ្ពស់នេះមិនអាចបោះចោលការហ្វឹកហាត់ទាំងស្រុងបានឡើយ បើមិនដូច្នេះទេនឹងធ្លាក់ចុះយ៉ាងខ្លាំងនូវគុណភាពបច្ចេកទេស ដោយកម្ពុជាកំពុងសម្រួចគោលដៅឆ្ពោះទៅស៊ីហ្គេម លើកទី៣២ ឆ្នាំ២០២៣។ ឯកឧត្ដមបានលើកឡើងថា ក្នុងស្ថានភាពវិបត្តិជំងឺកូវីដ-១៩នេះប្រទេសណាក៏ប៉ះពាល់លើផ្នែកបច្ចេកទេសដូចគ្នាដែរ សម្រាប់ ស៊ីហ្គេម ឆ្នាំ២០២៣ ប៉ុន្តែម្ចាស់ផ្ទះកម្ពុជាកំពុងប្រែក្លាយវិបត្តិនេះឱ្យទៅជាការរៀបចំខ្លួនឱ្យបានរឹងមាំ ហើយត្រូវចាប់ផ្តើមចេញដំណើរដោយភាពស្វាហាប់។
ឯកឧត្ដមអគ្គលេខាធិការបានបន្ដថា ស្ថានភាពជាក់ស្តែងយើងរងផលប៉ះពាល់ ដោយមិនត្រឹងតែកម្ពុជាទេ គឺប៉ះពាល់ដល់ការហ្វឹកហាត់ត្រៀមរបស់បណ្តាប្រទេសអាស៊ាន ដែលគ្រោងនឹងចូលរួមប្រជែងមេដាយនៅកម្ពុជា នាពេលនោះ ក៏ទទួលរងផលប៉ះពាល់វិបត្តិជំងឺនេះដូចគ្នា រហូតដល់ប្រទេសខ្លះបានដាក់ប្រទេសខ្លួនក្នុងភាពអាសន្ន ដោយបិទការហ្វិតហាត់ ការប្រកួតទាំងអស់។
ឯកឧត្ដមបានបន្ថែមថា ក្នុងស្ថានភាពនេះ គឺកីឡាករ កីឡាការិនីជម្រើសជាតិទាំងអស់ត្រូវបានឈប់សម្រាក ប៉ុន្តែគឺជាការសម្រាកសកម្ម ដែលនៅមានការហ្វឹកហាត់ នៅតាមផ្ទះ ដែលគោលដៅស៊ីហ្គេម ២០២៣ ត្រូវតែធ្វើ ហើយត្រូវឈរនៅលើស្មារតីធ្វើដោយការទទួលខុសត្រូវ និងធ្វើឱ្យជោគជ័យ៕
