Bernardo Silva កាលពីថ្ងៃម្សិលមិញនេះ បានផ្សាយផ្ទាល់នៅលើបណ្ដាញសង្គម Instagram ដោយមានជជែកឆ្លើយឆ្លងនូវសំណួរជាច្រើន ជាមួយនឹងក្រុមការងារ Bleacher Report។
ក្នុងនោះមានសំណួរចាក់ដោតមួយចំនួន ហើយពាក់ព័ន្ធនឹង Cristiano Ronaldo ដែលជាមិត្តរួមជម្រើសជាតិព័រទុយហ្គាល់ Silva ក៏លួចបង្ហើបអំពីផែនការណ៍របស់ CR7 ក្នុងគ្រុបឆាត WhatsApp ដែលផ្ដួចផ្ដើមចង់ឲ្យក្រុមបាល់ទាត់ជម្រើសជាតិបរិច្ចាគនូវទឹកប្រាក់ដែលបានឈ្នះពីវគ្គជម្រុះ Euro ២០២០ ទៅកាន់យុទ្ធនាការប្រយុទ្ធប្រឆាំងនឹងវីរុស COVID-19។
Silva បាននិយាយ៖ “Ronaldo គឺជាមនុស្សម្នាក់ ដែលកាលពី ២ ទៅ ៣ ថ្ងៃមុនគាត់បានផ្តល់គំនិតឲ្យធ្វើការឧបត្ថម្ភប្រាក់ឈ្នះរបស់យើង ដែលយើងបានឆ្លងផុត Euro 2020 ហើយខ្ញុំគិតថាកីឡាកររបស់យើងទាំងអស់នឹងបរិច្ចាគនូវទឹកប្រាក់ ៥០ ភាគរយនៃប្រាក់ដែលបានឈ្នះនោះ”។
បញ្ជាក់ថាចំពោះទំហំទឹកប្រាក់ប៉ុន្មាននោះ គឺមិនមានការបង្ហើបប្រាប់ពីតួលេខជាក់លាក់ឡើយ។ រំឭកថា Ronaldo កន្លងមកធ្លាប់បានបរិច្ចាគទឹកប្រាក់ ១ លានផោនជាមួយនឹងភ្នាក់ងារ Jorge Mendes ទៅកាន់ផ្នែកសុខាភិបាលក្នុងប្រទេសព័រទុយហ្គាល់ម្តងរួចមកហើយ៕
ប្រភព៖ AF